.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 141
Hüküm no: 211
Orijinal metin no: [94-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Sefer b. Abdullah’ın sakalını yolması sebebiyle Mustafa b. Abdullah tarafından sakalının yolunduğunun tespit edildiği

Oldur ki, Keçeci mahallesinde sâkin olan Sefer b. Abdullah nâm kimesne mahfil-i kazâda Şa‘ban mahallesinden Mustafa b. Abdullah nâm kimesneyi meclis-i şer‘a ihzâr muvâcehesinde takrîr-i kelâm ve ta‘bîr-i merâm kılıp merkūm Mustafa benim sakalım yoldu, bi-hasebi’ş-şer‘i’ş-şerîf hakkım taleb ederim, suâl olunsun dedikde mezbûr Mustafa’ya suâl olundukda inkâr ile cevâb vericek, müdde‘î-i mezbûrdan beyyine taleb olundukda udûl-i ricâlden Mustafa b. Ahmed ve Mehmed b. Kasım nâm kimesneler li-ecli’ş-şehâde hâzırân olup şehâdet-i şer‘iye eyleyip dediler ki, bizim yanımızda merkūm Mustafa mezbûr Sefer’in sakalın yoldu, Allah için şâhidiz, şehâdet dahi ederiz dediklerinden sonra şehâdetleri hayyiz-i [95] kabûlde vâki‘ oldukdan sonra mâ-hüve’l-vâki‘ bi’t-taleb [ketb] olundu.

Tahrîren fî-evâsıtı Saferü’l-muzaffer sene tis‘a ve elf.

Şuhûdü’l-hâl: Mehmed b. Mehmed el-hatîb, Mustafa b. Hasan el-imâm, Mehmed b. Mehmed, Seyyid Hasan b. Hamza, Mustafa b. Abdullah er-râcil