|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 145 Hüküm no: 220 Orijinal metin no: [99-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Emine Hatun’un kocasına ait evin yarı hissesini satın aldığı
Havâss-ı Kostantıniyye (...) Hüseyin mahallesinde sâkin olan (...) şer‘-i şerîfe hazır olup zevcesi olan Emine bt. (...) hatunu mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp dedi ki, mahalle-i mezbûrda vâki‘ bir tarafı Murad Reis mülküne ve bir tarafı Emir Efendi bağına ve bir tarafı Turşucu Vakfı’na ve bir tarafı tarîk-i hâssa işbu hudûd-ı erba‘a ile mahdûd olan mülk iki odamı içinde müsmire ve gayri müsmiresi ve kenîf ile nısfın işbu hâmil-i hâze’l-kitâb mezbûre Emine Hatun’a râyic fi’l-vakt üç bin nakd akçeye bey‘-ı bât ile bey‘ edip kabz-ı semen ve teslîm-i mebî‘ eyledim dedikde, mukırr-ı mezbûrun ikrârın vech-i meşrûh üzere mukarrun lehu’l-mezbûre Emine Hatun vicâhen ve şifâhen tasdîk ve tahkīk edip temessük iltimâs eylemeğin bu hurûf tasvîr olunup tâlib yedine vaz‘ u def‘ olundu ki vakt-i hâcetde ihticâc edine.
Cerâ zâlike ve hurrire fî-evâsıtı şehri Rebî‘i’l-evvel sene tis‘a ve elf.
Şuhûdü’l-hâl: Mehmed b. Mehmed el-hatîb, Mehmed b. Haydar el-müezzin, Kasım b. Ali el-müezzin, Rıdvan Bey b. Abdullah, Hüsrev b. Abdullah el-mütevellî, Osman b. Ömer el-müezzin, Halil b. İbrahim el-müezzin, Ali Çelebi b. Çerkez Memi, Mehmed b. Hasan, Bahaeddin b. Hüseyin.
|