|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 146 Hüküm no: 221 Orijinal metin no: [99-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hasköy kasaplarından Paskal v. Yorgi’nin noksan tartı ile et sattığı
Oldur ki, Hasköy’de bi’l-fi‘il muhtesib olan Mehmed b. Kasım nâm kimesne mahfil-i kazâda Hasköy kasablarından Paskal v. Yorgi nâm zimmîyi meclis-i şer‘a ihzâr muvâcehesinde takrîr-i kelâm edip dedi ki, Rıdvan Bey’e ve Bahaddin b. Hüseyin nâm kimesneye ve Ekmekçi kâfirine mezbûr kasab lahm vermiş, bi-hesâb-ı şer‘-i şerîf vezn olunmasın taleb ederim dedikde mezbûrların lahmleri vezn olundukda Rıdvan Bey’e iki vukıyye lahm verip iki vakıyyede otuz beş dirhem noksanı olup ve Bahaddin nâm kimesneye bir okka lahm verip bir okkada yirmi dört dirhem noksanı olup ve Ekmekçi kâfirine bir buçuk okka verip vezn olundukda otuz beş dirhem noksanı bulunup [mâ]-vaka‘a Mehmed nâm muhtesib talebiyle mâ-hüve’l-vâki‘ ketb ü imlâ olunup [yed-i] tâlibe vaz‘ olundu.
Tahrîren fî-evâsıtı şehri Rebî‘i’l-evvel sene tis‘a ve elf.
Şuhûdü’l-hâl: (...) b. İbrahim el-müezzin, Kasım b. Ali el-müezzin, Rıdvan Bey b. Abdullah, Seyyid Hasan b. Hamza, Bahaddin b. Hüseyin
|