.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 146
Hüküm no: 222
Orijinal metin no: [100-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Bostan Reis’in sattığı karpuzun narhdan yüksek fiyata satıldığının tespit edildiği

[Oldur ki, Hasköy’de] bi’l-fi‘il muhtesib olan Mehmed b. Kasım nâm kimesne mahfil-i kazâda Bostan Reis nâm kimesneyi meclis-i şer‘a ihzâr muvâcehesinde takrîr-i kelâm edip mezbûr Reis Keyvan b. Abdullah nâm kimesneye karpuz vermiş bi-hasebi’ş-şer‘i’ş-şerîf suâl olunmasın taleb ederim dedikde mezbûr Reis’e bu karpuz senin midir deyü suâl olundukda benimdir deyü cevâb verip merkūm Keyvan’a bu karpuzu mezbûr Reis sana kaç akçeye verdi deyü suâl olundukda beş akçeye verdi deyü cevâb verdikden sonra mezbûr muhtesib karpuzu vezn olunmasın taleb ederim dedikde karpuz vezn olundukda beş akçeye verdiğin karpuz yedi buçuk vukıyye gelip narh-ı cârî üzere hesâb edip bir akçe altı pul edip mâ-vaka‘a muhtesib olan Mehmed nâm kimesne talebiyle mâ-hüve’l-vâki‘ bi’t-taleb kaydolundu.

Tahrîren fî-evâsıtı Rebî‘i’l-evvel sene tis‘a ve elf.

Şuhûdü’l-hâl: Fahrü’l-kuzât Seyyid Mehmed Efendi, el-Hâc Memi b. Mustafa, Halil b. Ali el-hatîb, İlyas b. Mehmed, el-Hâc Mustafa b. Hüseyin, Seyyid Hasan b. Seyyid Hamza ve gayruhum