.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 147
Hüküm no: 223
Orijinal metin no: [100-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Kaşıkçı Hasan’ın “kaşığın adedini bir akçeden aşağıya vermem” dediğinin muhtesib talebiyle sicile kaydedildiği

Oldur ki Hasköy’de bi’l-fi‘il muhtesib olan Mehmed b. Kasım nâm kimesne mahfil-i kazâda İstanbul sâkinlerinden Hasan nâm kaşıkçıyı meclis-i şer‘a ihzâr muvâcehesinde takrîr-i kelâm edip mezbûr kaşıkçıdan Müslümânlar kaşık istedikde birin bir akçeden eksiğe vermem, birin bir akçeye vermeye emrimiz vardır demiş, bi-hasebi’ş-şer‘i’ş-şerîf suâl olunup tahrîr olunmasın taleb ederim dedikde mezbûr Hasan’a suâl olundukda inkâr ile cevâb vericek müdde‘î-i mezbûrdan, elimde emrim vardır dediğine beyyine taleb olundukda udûl-i ricâlden Durak b. Hüseyin ve Ahmed b. Abdullah nâm kimesneler şehâdet-i şer‘iye eyleyip dediler ki, bizim yanımızda birin bir akçeye vermeğe emrimiz vardır dedi deyü şehâdet-i şer‘iye eyleyip şehâdetleri hayyiz-i kabûlde vâki‘ olup mâ-hüve’l-vâki‘ muhtesib talebiyle kayd-ı sicil olundu.

Tahrîren fî-târîhi’l-mezbûr.

Şuhûdü’l-hâl: Mehmed b. Mehmed er-reîsi-i sultânî, Receb Efendi el-mülâzim, Kasım b. Ali el-müezzin, Osman b. Nasuh, Hasan b. Hamza