|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 147 Hüküm no: 224 Orijinal metin no: [101-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Derviş b. İlyas’a Abdüsselam mahallesindeki üç evin kendisine ait olduğuna dair şahitlerin şehadetiyle hüccet verildiği
Medîne-i hazret-i Ebî Eyyûbe el-Ensârî aleyhi’r-rahmeti’l-Bârî- [kazâsına tâbi‘] Hasköy’de Abdüsselam mahallesi sâkinlerinden Derviş b. İlyas nâm kimesne meclis-i şer‘-i şerîfe hazır olup şöyle takrîr-i kelâm ve ta‘bîr-i merâm kılıp dedi ki, mahalle-i mezbûrda vâki‘ bir tarafı Abdüsselam’ın vakıf bağçesine muttasıl ve bir tarafı Mahmud Bey mülküne ve bir tarafı kuyumcubaşı mülküne ve bir tarafı Mustafa el-imâm mülküne ve bir tarafı mezarlığa işbu hudûd-ı erba‘a ile mahdûd olan mülk üç dâne yer evlerimi içinde su kuyusuyla ve müsmire ve gayri müsmiresi olan mülk evimin elimde olan hüccetimi yavukladım? bi-hasebi’ş-şer‘i’ş-şerîf mahalle-i mezbûrdan suâl olunup hüccet taleb ederim dedikde fi’l-vâki‘ mahalle-i mezbûre suâl olundukda Mustafa b. Hüseyin el-imâm ve Mehmed b. Haydar el-müezzin ve Kaya b. Ahmed ve Hüsrev b. Abdullah el-mütevellî bi-Turşucu ve zeyl-i kitâbda mastûretü’l-esâmî olan Müslümânlar ve sâir cemm-i gafîr ve cem‘-i kesîr meclis-i şer‘-i şerîfe hâzırûn olup dediler ki, bu zikrolunan üç yer evlerin tevâbi‘ ve levâhık ile Derviş b. İlyas nâm kimesnenin mâl mülküdür deyü haber verdiklerinden sonra mezbûrların ihbârları hayyiz-i kabûlde vâki‘ olup temessük iltimâs eylemeğin bu hurûf tesvîd olunup tâlib yedine vaz‘ u def‘ olundu ki vakt-i hâcetde ihticâc edine.
Cerâ zâlike ve hurrire fî-evâhiri şehri Rebî‘i’l-evvel sene tis‘a ve elf.
Şuhûdü’l-hâl: Muzaffer b. Abdullah kiremitçi, Musa Bey b. Abdullah, Piyale Bey, Mustafa b. Memi Şah ve gayruhum
|