.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 150
Hüküm no: 230
Orijinal metin no: [103-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hasköy’de Kiryakoz tarafından kazdırılan kârizin halka zarar verdiği

Mahmiye-i Kostantıniyye -humiyet ani’l-beliyye- mahallâtından Yedikule’de sâkin Hızır v. Kara nâm Ermeni mahfil-i kazâda Havâss-ı Kostantıniyye muzâfâtından Hasköy sâkinlerinden Karagöz v. Dede ve Murad v. Davud nâm Ermeniler’i meclis-i şer‘-i hatîr-i lâzımü’t-tevkīre ihzâr ettikde muvâcehelerinde takrîr-i kelâm ve ta‘bîr-i merâm edip mezbûrlar Hasköy’de tarîk-i âm üzerine kâriz kazarlar, âmmeye zarardır, ba‘zı ahyânda râyihası çıkıp Müslimîn’e elem verir, şer‘le suâl olunsun, kimin ma‘rifetiyle kazarlar dedikde merkūmlara suâl olundukda Hasköy sâkinlerinden Kiryakoz nâm Yahûdî kazdırır dediklerinde Hasköy sükkânından Müslimîn-i muvahhidînden Mustafa b. Abdullah ve Osman b. Ömer el-müezzin ve Ahmed b. Cafer el-imâm nâm kimesneler meclis-i şer‘-i şerîfe ihzâr olunup suâl olundukda fi’l-hakīka zikrolunan kâriz nâ-ma‘kūldür ve kadîm-i eyyâmdan olmamışdır, hâşâ ümmet-i Muhammed’e ihânet için kazar, ihdâsdır, şer‘le men‘ olunması mühimmât-ı dîniyeden [idüğüne] iştibâh yokdur dedikleri mâ-hüve’l-vâki‘ sicile kayd [olunup] sûreti ihrâc olunup merkūm Hızır’ın yedine vaz‘ (...) vakt-i hâcetde müzekkir-i mâ-cerâ ola.

Tahrîren fî şehri [104] (...).

Şuhûdü’l-hâl: Halil b. Hızır, Haydar b. Hüseyin, Seyyid Hasan [b.] Seyyid Hamza, Mehmed b. Mustafa, Mehmed b. Kasım