.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 151
Hüküm no: 233
Orijinal metin no: [105-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Yamandi ve Lamborine’nin borçlarına karşılık evlerini rehin verdikleri

(...) iştirâ ve tesellüm ettikden sonra semeni olan meblağ-ı mezbûr yedi yüz seksen esedî tamamen yedinden ahz ü kabz eyledi dediklerinde gıbbe’t-tasdîk ve meblağ-ı mezbûrun cümlesine vâlidesi mezbûre Lamborine kefîl bi’l-mâl olup ve menzil-i mezbûrun derkine işbu hazır bi’l-meclis Hristodori nâm zimmî kefîl olmağın ve mezbûrân Yamandi ve Lamborine i‘âde-i kelâm edip eğer meblağ-ı mezbûru târih kitâbdan üç yüz altmış gün tamamına değin her birimiz edâya âciz olursak zikrolunan menzilimizi mahmiye-i İstanbul’da Sultan Ahmed Câmi‘-i şerîfi kurbünde sâkin Abdülkadir Ağa b. İbrahim nâm bevvâb-ı sultânî nâm kimesne bey‘a ve semeninden deyn-i mezkûru edâya ve ziyâde bahâ ederse bize îsâle tarafımızdan vekîl nâib-i menâb nasb ve ta‘yîn eyledik ol dahi vekâlet-i mezbûru kabûl ve hizmet-i lâzımesini edâya müte‘ahhid [ta‘ahhüd] ettikden sonra mâ-vaka‘a bi’t-taleb ketb olundu.

Tahrîren fi’l-yevmi’l-hâmis ve’l-işrîn min-şehri Rebî‘i’l-evvel li-sene ihdâ ve semânîn ve elf.

Şuhûdü’l-hâl: Abdülbaki Çelebi b. Ahmed Efendi, Hüseyin Ağa b. Muharrem, Mahmud Çelebi b. Mehmed, Şa‘banzâde Mehmed Çelebi b. Ahmed, Boğacızâde Hasan Çelebi, Bogāsıcı Ahmed Çelebi, Dilaver Bey b. Abdullah, Evliyâ Çelebi, Ramazan Bey b. Abdullah, İbrahim Çelebi b. Dilaver ve gayruhum