.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 152
Hüküm no: 235
Orijinal metin no: [105-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Aslan v. Menabeke’nin cariyesi Hanna’yı kitabet yoluyla azat ettiği

Havâss-ı aliyye kazâsı muzâfâtından kasaba-i Hasköy’de Kiremitçi Ahmed Çelebi mahallesinde sâkin Aslan v. Menabeke nâm Yahûdî meclis-i şer‘-i şerîfde kendüye rıkkıyetini mu‘terife olan uzun boylu, açık kaşlı, elâ gözlü, Rusiyyetü’l-asl işbu hâmiletü’l-kitâb Hanna bt. Hırsakula nâm câriyesi muvâcehesinde ikrâr ve takrîr-i kelâm edip târih-i kitâbdan bir sene tamamına dek bana sadâkatle hizmet etmek üzere kitâbete kesdim, sene tamamında mâlımdan âzad olup sâir ahrâr-ı asliyât gibi hürre olsun dedikde ol dahi kitâbet-i mezbûreyi kabûl edicek mâ-hüve’l-vâki‘ bi’t-taleb ketb olundu.

Tahrîren fi’l-yevmi’s-sâbi‘ ve’l-işrîn min-şehri Rebî‘i’l-evvel li-sene ihdâ ve semânîn ve elf.

Şuhûdü’l-hâl: İbrahim Çelebi b. Dilaver, Dilaver Bey b. Abdullah, Ramazan Bey b. Abdullah, Hüseyin b. Abdülkadir ve gayruhum