.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 153
Hüküm no: 236
Orijinal metin no: [106-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Yako v. Salamon’un Marmara adasından içki getiren gemiden içki satın aldığı

Havâss-ı aliyye kazâsı muzâfâtından kasaba-i Hasköy’de Keçeci el-Hâc Mehmed mahallesinde sâkin işbu bâ‘isü’s-sifr Yako v. Salamon nâm Yahûdî meclis-i şer‘-i şerîfde takrîr-i kelâm edip mahmiye-i Galata’ya tâbi‘ cezîre-i Marmara’dan târih-i kitâb günü sefîne ile hamr getirip bana bey‘ eylemişlerdir taraf-ı saltanat-ı aliyyeden men‘ ü def‘ olunmak ihtimâli vardır deyü istimâ‘ım olmuşdur, kasaba-i Hasköy iskelesine sefîne-i hamr dâhil olduğunu ma‘lûm olan kimesnelerden suâl olunup ihbârları tahrîr ve sicile kayd ve hüccet olunmak matlûbumdur dedikde kasaba-i mezbûrede sâkin Hüseyin Çelebi b. Muharrem ve Yusuf Bey b. Hasan ve Mehmed Beşe b. Hüseyin ve Sefer Beşe b. Abdullah ve Abbas Beşe b. Mustafa ve sâirleri li-ecli’l-ihbâr meclis-i şer‘a hâzırûn [olup] istihbâr olunduklarında fi’l-vâki‘ şehr-i Rebî‘ülevvelin on yedinci günü kasaba-i mezbûre iskelesine sefîne-i hamr dâhil olup mezbûr Yako Yahûdî sefîneden çıkmağa başladı deyü herbiri alâ-tarîkı’ş-şehâde haber verdiklerinden sonra zabten li’l-makāl bi’t-taleb ketb olundu.

Tahrîren fi’l-yevmi’s-sâbi‘ işrîn şehri Rebî‘i’l-evvel li-sene ihdâ ve semânîn ve elf.

Şuhûdü’l-hâl: Abdülbaki Çelebi b. Ahmed Efendi, Ramazan Bey b. Abdullah, Dilaver Bey b. Abdullah, İbrahim Çelebi b. Dilaver Bey, Mehmed Bey b. Ahmed, diğer Dilaver Bey b. Abdullah, Hüseyin b. Abdülkadir, Ali Çavuş b. Abdullah ve gayruhum