|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 153 Hüküm no: 237 Orijinal metin no: [106-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Saliha bt. Mustafa’nın evinin yarı hissesini kocası Muharrem Beşe’ye sattığı
Havâss-ı aliyye kazâsı muzâfâtından kasaba-i Hasköy’de Keçeci el-Hâc Mehmed mahallesinde sâkine Sâliha bt. Mustafa nâm Hatun tarafından bey‘-ı âti’l-beyânı ikrâra vekîl olup mezbûrenin zâtını ma‘rifet-i şer‘iye ile ârifân olan el-Hâc Halil b. Abdünnebi ve Hasan Çelebi b. Mustafa nâm kimesneler şehâdetleriyle şer‘an vekâleti sâbite olan Mehmed Ağa b. Ahmed nâm kimesne meclis-i şer‘-i şerîfde müvekkile-i mezbûrenin zevci işbu sahibü’l-kitâb Muharrem Beşe b. Mehmed nâm kimesne muvâcehesinde bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafı el-Hâc Halil mülkü ve bir tarafı Gazzaz Mustafa Çelebi mülkü ve bir tarafı Halil mülkü ve bir tarafı tarîk-i hâs ile mahdûd bir bâb fevkānî oda ve bir sofa ve bir mikdâr arz-ı hâliye ve kenîfi müştemil mülk menzilinin nısf-ı şâyi‘ini zevci mezbûr Muharrem Beşe’ye beş bin nakd râyic fi’l-vakt fıddî akçeye bey‘-ı bâtt-ı sahîh-i şer‘î ile bey‘ ve teslîm eyledi ol dahi vech-i muharrer üzere iştirâ ve tesellüm ettikden sonra semeni olan meblağ-ı mezbûr beş bin akçeyi tamamen yedinden ahz ü kabz eyledi, ba‘de’l-yevm zikrolunan menzilin nısfı mezkûr Muharrem Beşe’nin mülk-i müşterâsıdır, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’s-sânî min-şehri Rebî‘i’l-âhir li-sene ihdâ ve semânîn ve elf.
Şuhûdü’l-hâl: Mustafa Efendi b. Ali el-imâm, Abdurrahman Efendi b. Maksud, İbrahim Beşe b. Abdünnebi, Mehmed Bey b. Murtaza, Abdülbaki Çelebi b. Ahmed Efendi, Yusuf Çelebi b. Mustafa el-müezzin, İbrahim Çelebi b. Veli, Musa Çelebi b. Mehmed, İbrahim Çelebi b. Dilaver Bey, Mustafa Çelebi b. Dilaver Bey ve gayruhum
|