.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 154
Hüküm no: 238
Orijinal metin no: [107-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefat eden Mehmed Efendi’nin evinin vârisleri arasında paylaştırıldığı

Medîne-i Hazret-i Ebî Eyyûb Ensârî -aleyhi rahmeti’l-Meliki’l-Bârî- kasabası muzâfâtından kasaba-i Hasköy mahallâtından el-Hâc Şa‘ban mahallesinde sâkin iken bundan akdem müteveffâ olan merhûm Mehmed Efendi’nin verâseti zevce-i metrûkesi Fâtıma Hatun ile sulbiye kızları Hadîce ve Rukiye’ye ve sulbî oğulları Ahmed ve Süleyman’a münhasıra olup kable’l-kısmet mezbûre Rukiye dahi fevt olup verâseti vâlidesi merkūme Fâtıma ile li-ebeveyn kız karındaşı mezbûre Hadice’ye ve li-ebin er karındaşları Ahmed ve Süleyman’a münhasıra olup kable’l-kısmet mezbûre Fâtıma dahi fevt olup verâseti sadriye kızı mezbûre Hadice’ye münhasıra olup alâ-tarîkı’n-nâsiha tashîh-i mes’eleleri iki yüz seksen sekiz sehimden farz olunup sihâm-ı merkūmeden doksan bir sehmi mezbûrân Ahmed ve Süleyman’a ve yüz elli sehmi mezbûre Hadice’ye bi-tarîkı’l-inhisâr isâbet ve intikāl eylediği şer‘an zâhir ve müte‘ayyen oldukdan sonra mezbûre Hadice’nin zevci ve tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iye ile ârifân olan mezbûrân Ahmed ve Süleyman şehâdetleriyle şer‘an vekâleti sâbite olan Mehmed Bey b. Ahmed ve sinn [ve] cüsselerinin bulûğa tahammülü ve on altışar buçuk yaşlarında olup bulûğlarına i‘tirâfları olan merkūmân Ahmed ve Süleyman meclis-i şer‘-i hatîr-i lâzımü’t-tevkīrde her biri bi’l-asâle ve bi’l-vekâle ikrâr-ı tâm ve takrîr-i kelâm edip müteveffâ-yı mezbûrun muhallefâtından olup mahalle-i mezbûrede vâki‘ hudûd [ve] müştemilâtı beynimizde ma‘lûm olan menzilden mezbûre Hadice’nin hisse-i şer‘iyesi ta‘yîn ve tahsîs olunmak için her birimiz bi’l-asâle ve bi’l-vekâle kısmete tâlibler ve râzılar olmağın cânib-i şer‘den menzil-i mezbûrun üzerine varılıp ta‘yîn ve tahsîs olunmak murâdımızdır dediklerinde bu hakīr dahi hâssa mi‘mârlarından üstâd el-Hâc Ahmed b. Ahmed ve Ali Beşe b. Abdullah ve zeyl-i vesîkada muharrerü’l-esâmî olup ebniye ahvâline vukūf-ı şu‘ûru olan bî-garaz Müslimîn ile menzil-i mezbûrun üzerine varılıp evvelâ binâ olunan arsa mesâha eylediklerinde tûlen ve arzan bi-hesâb-ı şatrancî üç yüz altmış zirâ‘ olup zirâ‘-ı mezkûrdan yüz otuz üç zirâ‘ mezbûre Hadice’nin hissesine isâbet eyledikde cânib-i şimâlde olan bir bâb fevkānî ve tavansız oda ve bir âbdesthâne ve bir kenîf ve bir zokak kapısı ve bir mikdâr mahzen ve sâlifü’z-zikr odanın duvarı müşterek olup alâmet-i fâsıla vaz‘ olundukda arsada ve binâda noksan olmak ile mezbûrân Ahmed ve Süleyman seksen kıt‘a esedî guruş dahi noksana mu‘âdil olmak üzere mezbûre Hadice’ye verildikden sonra yine menzil-i mezbûra muttasıl olan hadîka mesâha eyledikde tûlen ve arzan bi-hesâbi’l-mezkûr altı yüz yirmi dört zirâ‘ olup zirâ‘-ı mezkûrdan merkūme Hadice’ye iki yüz otuz zirâ‘ hadîka ve bir kapı isâbet edip kezâlik alâmet vaz‘ olundukda beynlerinde olan arsa on iki zirâ‘ dolma duvar mâ‘adâ tahta perdeye müşterek olmak üzere tarafeyn râzı oldukdan sonra mezbûrân Ahmed ve Süleyman hisselerine fevkā[nî] ve tahtânî beş bâb tavanlı oda ve tahta-pûş ve bir matbah ve iki mahzen ve bir kenîf ve bir zokak kapısı ve hadîkada olan üç yüz doksan dört zirâ‘ arsa ve kapı ve mezbûrân Ahmed ve Süleyman hisselerine ta‘yîn [ve] tahsîs olunup beynlerinde müşâ‘ ve müşterek kalmağın mâ-vaka‘a bi’t-taleb ketb olundu.

Tahrîren fi’l-yevmi’s-sânî min-şehri Rebî‘i’l-âhir li-sene ihdâ ve semânîn ve elf.

Şuhûdü’l-hâl: Ali Efendi b. el-Hâc Mehmed, Abdülbaki Çelebi b. Ahmed Efendi, Ali Efendi el-imâm-ı saray-ı sultânî, Sefer Bey b. İlyas, Ali Beşe b. Abdullah, Mehmed Bey b. Mustafa, Nasuh Halîfe b. Ali el-müezzin, Yusuf Bey b. Sefer, el-Hâc Mustafa Bey b. Musa, Şa‘ban Bey b. Hüseyin, Mustafa Beşe b. Mustafa, Abdullah Çelebi b. Hasan, Ali b. İbrahim, İbrahim Çelebi b. Dilaver Bey, Mehmed Çelebi b. Sefer ve gayruhum