|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 155 Hüküm no: 239 Orijinal metin no: [108-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefat eden Mustafa Çelebi’nin mallarının vârisleri arasında paylaşıldığı
Havâss-ı aliyye kazâsı muzâfâtından kasaba-i Hasköy’de Kiremidci Ahmed Çelebi mahallesinde sâkin iken bundan akdem vefât eden es-Seyyid Mustafa Çelebi b. Pir Veli nâm kimesnenin verâseti sulbî kebîre kızı İsmihan nâm hatun ile li-ebin er karındaşı İbrahim Çelebi nâm kimesneye münhasıra oldukdan sonra mezbûr İbrahim Çelebi meclis-i şer‘-i şerîfde işbu sahibetü’l-kitâb mezbûre İsmihan tarafından husûs-ı âti’l-beyânı tasdîke vekîl olup mezbûrenin zâtını ma‘rifet-i şer‘iye ile ârifân olan Mehmed Bey b. Murtaza ve Musa Çelebi b. Mehmed nâm kimesneler şehâdetleriyle şer‘an vekâleti sâbite olan zevci Mehmed Ağa b. Ahmed nâm kimesne muvâcehesinde ikrâr ve takrîr-i kelâm edip müteveffâ-yı mezbûrun muhallefâtından olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd iki bâb tahtânî menzil ve bir mikdâr bağçeyi mezbûre İsmihan hissesine verilip ve hâriciye iki kepenk bakkāl dükkânının nısf hisse-i şer‘iyem mukābelesinde alâ-tarîkı’t-tehârüci’ş-şer‘î ben ahz ü kabz eyledim, ba‘de’l-yevm zikrolunan menzile ve sâir muhallefâtına müte‘allik da‘vâdan müvekkile-i mezbûre İsmihan’ın zimmetini ibrâ-i âmm ile ibrâ ve ıskāt eyledim dedikde vekîl-i mezbûr Mehmed Ağa bi’l-muvâcehe tasdîk ve bi’l-müşâfehe tahkīk edicek mâ-vaka‘a bi’t-taleb ketb olundu.
Tahrîren fi’l-yevmi’s-sânî min-şehri Rebî‘i’l-âhir li-sene ihdâ ve semânîn ve elf.
Şuhûdü’l-hâl: Abdurrahman Efendi b. Maksud el-imâm, Mustafa Efendi b. Ali el-imâm, İbrahim Beşe b. Abdünnebi, Mehmed Bey b. Murtaza, Yusuf Çelebi b. Mustafa el-müezzin, İbrahim Çelebi b. Veli, Abdünnafi Çelebi b. Ahmed Efendi, Musa Çelebi b. Dilaver Bey, Mustafa Çelebi b. Dilaver Bey, İbrahim Çelebi b. Dilaver ve gayruhum
|