|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 156 Hüküm no: 240 Orijinal metin no: [108-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefat eden Mustafa Çelebi’nin muhallefatının vârisleri arasında taksimi
Havâss-ı aliyye kazâsı muzâfâtından kasaba-i Hasköy’de Kiremitçi Ahmed Çelebi mahallesinde sâkin iken bundan akdem vefât eden es-Seyyid Mustafa Çelebi b. Pir Veli nâm kimesnenin verâseti sulbî kebîre kızı İsmihan ile li-ebin er karındaşı İbrahim Çelebi nâm kimesneye münhasıra oldukdan sonra mezbûre İsmihan Hatun tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iye ile ârifân olan Mehmed Bey b. Murtaza ve Musa Çelebi b. Mehmed nâm kimesneler şehâdetleriyle şer‘an vekâleti sâbite olan zevci Mehmed Ağa b. Ahmed Efendi nâm kimesne meclis-i şer‘-i şerîfde işbu bâ‘isü’l-kitâb mezbûr İbrahim Çelebi muvâcehesinde bi’l-vekâle ikrâr ve takrîr-i kelâm edip mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd iki bâb tahtânî menzil ve bir mikdâr bağçeyi müvekkile-i mezbûre İsmihan hissesine verilip ve hâriciye iki gedik bakkāl dükkânını mezbûr İbrahim Çelebi’ye alâ-tarîkı’t-tehârüc ahz ü kabz edip müteveffâ-yı mezbûrun muhallefâtına müte‘allik da‘vâdan mezbûr İbrahim Çelebi’nin zimmetini ibrâ-i âmm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’s-sânî min-şehri Rebî‘i’l-evvel li-sene ihdâ ve semânîn ve elf.
Şuhûdü’l-hâl: Abdurrahman Efendi b. Maksud el-imâm, Mustafa Efendi b. Ali el-imâm, İbrahim Beşe b. Abdünnebi, Mehmed Bey b. Murtaza, Yusuf Çelebi b. Mustafa el-müezzin, İbrahim Çelebi b. Veli, Abdülbaki Çelebi b. Ahmed Efendi, Mustafa Çelebi b. Dilaver Bey, İbrahim Çelebi b. Dilaver ve gayruhum
|