.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 156
Hüküm no: 241
Orijinal metin no: [109-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mahmud Bey’in cariyesini azat ettiği

Havâss-ı aliyye kazâsı muzâfâtından kasaba-i Hasköy’de Pîrî Paşa mahallesinde sâkin fahrü’l-akrân Mahmud Bey b. Musa Paşa tarafından husûs-ı âti’l-beyânı ikrâra vekîl olup Mehmed Bey b. Ali ve Ömer Beşe b. Hızır nâm kimesneler şehâdetleriyle şer‘an vekâleti sâbite olan Mehmed Efendi b. Süleyman nâm kimesne meclis-i şer‘-i şerîfde müvekkili müşârün-ileyhe rıkkıyetini mu‘terife olan uzun boylu, açık kaşlı, elâ gözlü, Rusiyyetü’l-asl işbu sahibetü’l-kitâb Nazenin bt. Abdullah nâm câriyesi muvâcehesinde bi’l-vekâle ikrâr ve takrîr-i kelâm edip mezbûr Nazenin hasbeten lillâhi’l-aliyyü’l-azîm ve taleben li-merzâti’r-Rabbi’r-Rahîm mâlından i‘tâk ve tahrîr ve sâir ahrâr-ı asliyât gibi hürre olup üzerinde hakk-ı velâdan gayrı hakkı kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Tahrîren fi’l-yevmi’s-sâmin min-şehri Rebî‘i’l-âhir li-sene ihdâ ve semânîn ve elf.

Şuhûdü’l-hâl: Ahmed Bey b. Musa Paşa, Ahmed Çelebi b. Mehmed, Ali Bey el-cündî, İbrahim Bey el-bevvâb-ı sultânî, Şahabeddin b. Abdullah, Ali Çelebi b. Mustafa el-müezzin, Ali Çelebi b. Ömer Dede el-kayyum, Mehmed odabaşı, Mehmed Çelebi [b.] Hazînedâr Hüseyin Ağa, İbrahim Çelebi b. Dilaver, Dila[ver] Bey b. Abdullah ve gayruhum