|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 157 Hüküm no: 242 Orijinal metin no: [109-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mahmud Bey’in cariyesini azat ettiği
Havâss-ı aliyye kazâsı muzâfâtından kasaba-i Hasköy’de Pîrî Paşa mahallesinde sâkin fahrü’l-akrân Mahmud Bey b. Musa Paşa tarafından husûs-ı âti’l-beyânı ikrâra vekîl olup Mehmed Bey b. Ali ve Ömer Beşe b. Hızır nâm kimesneler şehâdetleriyle şer‘an vekâleti sâbite olan Mehmed Efendi b. Süleyman nâm kimesne meclis-i şer‘-i şerîfde müvekkil-i müşârün-ileyhin kendüye rıkkıyetini mu‘terife olan uzun boylu, açık kaşlı, elâ gözlü, Rusiyyetü’l-asl işbu sahibetü’l-kitâb Meknun bt. Abdullah nâm câriyesi muvâcehesinde bi’l-vekâle ikrâr ve takrîr-i kelâm edip mezbûre Meknun hasbeten lillâhi’l-aliyyü’l-azîm ve taleben li-merzâti’r-Rabbi’r-Rahîm mâlından i‘tâk ve tahrîr ve sâir ahrâr-ı asliyât gibi hürre olup üzerinde hakk-ı velâdan gayrı hakkı kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’s-sâmin min-şehri Rebî‘i’l-âhir li-sene ihdâ ve semânîn ve elf.
Şuhûdü’s-sâbıkūn
|