|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 157 Hüküm no: 243 Orijinal metin no: [109-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Benhas v. Yaşova’nın evini sattığı
Havâss-ı aliyye kazâsı muzâfâtından kasaba-i Hasköy’de Keçeci mahallesinde sâkin Benhas v. Yaşova mu‘allim nâm Yahûdî tarafından bey‘-ı âti’l-beyânı ikrâra vekîl olup Şeban v. Yasef ve İsak v. Yako nâm Yahûdiler şehâdetleriyle şer‘an vekâleti sâbite olan Biram v. İsak nâm Yahûdî meclis-i şer‘-i şerîfde yine müvekkil-i mezbûrun anası işbu bâ‘isü’s-sifr Saltana bt. Mosi nâm Yahûdiyye tarafından husûs-ı âti’l-beyânı tasdîke vekîl olup Paroh v. ( ) ve Sabatay v. ( ) nâm Yahûdiler şehâdetleriyle şer‘an vekâleti sâbite olan Salamon v. ( ) nâm Yahûdî muvâcehesinde bi’l-vekâle ikrâr ve takrîr-i kelâm edip müvekkil-i mezbûrun mülk-i mevrûsu olup mahalle-i mezbûrede vâki‘ bir tarafı Hale Yahûdiye mülkü ve bir tarafı Avraham Yahûdî mülkü ve bir tarafı mezbûr Benhas Yahûdî mülkü [110] ve bir tarafı müvekkil-i mezbûr arsa-i hâliyesi ile mahdûd iki bâb tahtânî ve iki bâb fevkānî odaları ve bir ev fırını ve zikrolunan odalar arsasıyla tûlen ve arzan bi-hesâbi’ş-şatrancî iki yüz otuz bir zirâ‘ arsayı müştemil mülk menzilini cümle tevâbi‘ ve levâhık ile iki yüz otuz bir esedî guruşa müvekkile-i mezbûreye bey‘-ı bâtt-ı sahîh-i şer‘î ile bey‘ ve teslîm ol dahi minvâl-i muharrer üzere iştirâ ve tesellüm ettikden sonra semen olan meblağ-ı mezbûr iki yüz otuz bir guruşu cihet-i deyn-i şer‘den müvekkil-i mezbûrun zimmetinde olan iki yüz seksen esedî guruşun iki yüz otuz bir guruşu ile takās edip bâkī kırk dokuz guruşu dahi müvekkile-i mezbûre Saltana’ya teslîm olunup ba‘de’l-yevm hudûd-ı mezkûr ile mahdûd olan odalar ve arsa mülk-i müşterâsıdır, keyfe mâ yeşâ’ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’s-sâlis aşer min-şehri Rebî‘i’l-âhir li-sene ihdâ ve semânîn ve elf.
Şuhûdü’l-hâl: Mehmed Efendi b. Mustafa el-imâm, Abdülbaki Çelebi b. Ahmed Efendi, Mehmed Çavuş b. Abdullah, Veli Bey b. Abdullah, Ramazan Bey b. Abdullah, Dilaver Bey b. Abdullah, Mehmed Çelebi b. Ali, Davud Çavuş b. Şa‘ban, Mehmed Çelebi b. Abdullah, İbrahim Çelebi b. Dilaver Bey, Ali Çavuş b. Abdullah ve gayruhum
|