|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 158 Hüküm no: 244 Orijinal metin no: [110-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Fatma bt. Osman ile Mehmed Çelebi’nin muhâlaa ile boşandıkları
Havâss-ı aliyye kazâsı muzâfâtından kasaba-i Hasköy’de Keçeci el-Hâc Mehmed mahallesinde sâkine Fâtıma bt. Osman nâm Hatun meclis-i şer‘-i şerîfde zevci işbu bâ‘isü’l-kitâb Mehmed Çelebi b. Mustafa nâm kimesne muvâcehesinde ikrâr ve takrîr-i kelâm edip mezbûr Mehmed Çelebi zimmetinde mukarrer olan iki bin üç yüz akçe mehr-i müeccelim ve nafaka-i iddet-i ma‘lûmem ve meûnet-i süknâmdan geçmek üzere zevcim mezbûr Mehmed Çelebi ile muhâla‘a-i sahîha-i şer‘iye ile hul‘ olup ol dahi hul‘-ı mezbûru kabûl ettikden sonra zikrolunan iki bin üç yüz akçe mehr-i müeccel ve nafaka-i iddet ve meûnet-i süknâm da‘vâsından mezbûr Mehmed Çelebi’nin zimmetini ibrâ-i âmm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’s-sâdis aşer min-şehri Rebî‘i’l-âhir li-sene ihdâ ve semânîn ve elf.
Şuhûdü’l-hâl: Abdurrahman Efendi b. Mansur, Mehmed Bey b. Himmet, Yusuf Çelebi b. Mustafa, Yusuf Çelebi b. Mustafa, Yusuf Ağa b. Hasan
|