.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 159
Hüküm no: 246
Orijinal metin no: [111-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Benhas v. Yaşova’nın evini Salamon’a sattığı

Havâss-ı aliyye kazâsı muzâfâtından kasaba-i Hasköy’de Keçeci el-Hâc Mehmed mahallesinde sâkin Benhas v. Yaşova mu‘allim nâm Yahûdî tarafından bey‘-ı âti’l-beyânı ikrâra vekîl-i müsecceli olan Biram? v. İsak nâm Yahûdî meclis-i şer‘-i şerîfde yine mahalle-i mezbûrda sâkin işbu sahibü’l-vesîka Salamon v. Kemol Küpeli nâm Yahûdî tarafından husûs-ı âti’l-beyânı tasdîka vekîl olup Şeban v. Yasef ve İlya v. Yakob nâm Yadudiler şehâdetleriyle şer‘an vekâleti sâbite olan Salamon v. İsak nâm Yahûdî muvâcehesinde bi’l-vekâle ikrâr ve takrîr-i kelâm edip müvekkil-i mezbûrun mülk-i mevrûsu olup mahalle-i mezbûrede vâki‘ iki tarafı müvekkil-i mezbûr Benhas Yahûdî mülkü ve bir tarafı Avraham v. Mosi Yahûdî mülkü ve bir tarafı tarîk-i hâs ile mahdûd bir bâb fevkānî ve bir bâb tahtânî odaları ve bir fırını müştemil mülk menzilini cümle tevâbi‘ ve levâhıkı ile müvekkil-i mezbûr Salamon’a elli kıt‘a esedî guruşa bey‘-ı bâtt-ı sahîh-i şer‘î ile bey‘ ve teslîm eyledim, ol dahi vech-i muharrer üzere iştirâ ve tesellüm ettikden sonra semeni olan meblağ-ı mezbûr elli esedî guruşu yedinden bi’l-vekâle tamamen ahz u kabz eyledim, ba‘de’l-yevm hudûd-ı mezkûr ile mahdûd olan menzil müvekkil-i merkūm Salamon’un mülk-i müşterâsıdır, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb [ketb] olundu.

Tahrîren fi’l-yevmi’s-sâlis ve’l-işrîn min-şuhûr Rebî‘i’l-âhir li-sene ihdâ ve semânîn ve elf.

Şuhûdü’l-hâl: Mehmed Çelebi b. Ahmed Kalenderi, Mehmed Çavuş b. Abdullah, Ali Çelebi b. Abdullah, Dilaver Bey b. Abdullah, İbrahim Çelebi b. Dilaver, Yusuf Ağa b. Hasan, Ramazan Bey b. Abdullah, Hüseyin b. Abdülkadir, Ahmed Beşe b. İbrahim, Hüseyin Efendi b. Abdülfettah ve gayruhum