.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 160
Hüküm no: 248
Orijinal metin no: [112-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mustafa Çelebi ile zevcesinin cariyeleri Kâmile bt. Abdullah’ı azat ettikleri

Mahmiye-i İstanbul mahallâtından Çukur mahallede sâkin el-Hâc Mustafa Çelebi b. Sinan nâm kimesne kendi tarafından asâleten ve zevcesi Bağıcinan bt. Abdullah tarafından husûs-ı âti’l-beyânı ikrâra vekîl olup hasm-ı şer‘î-i câhid mahzarında mezbûrenin zâtını ma‘rifet-i şer‘iye ile ârifân olan Hüseyin Efendi b. Abdülfettah ve Ahmed Çelebi b. Hüseyin nâm kimesneler şehâdetleriyle şer‘an vekâleti sâbite olan mezbûr el-Hâc Mustafa nâm kimesne meclis-i şer‘-i şerîfde rıkkıyetini kendülere mu‘terife olan orta boylu, açık kaşlı, sarı elâ gözlü, Rusiyyetü’l-asl müşterek câriyeleri işbu sahibü’l-kitâb Kâmile bt. Abdullah nâm câriyeleri muvâcehesinde asâleten ve vekâleten ikrâr ve takrîr-i kelâm edip târih-i kitâbdan yedi ay mukaddem mezbûre Kâmile’yi hasbeten lillâhi’l-aliyyü’l-azîm ve taleben li-merzâti’r-Rabbi’r-Rahîm mâlımdan i‘tâk ve tahrîr ve sâir ahrâr-ı asliyât gibi hürre olup üzerinde hakk-ı velâdan gayrı hakkımız bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Tahrîren fi’l-yevmi’t-tâsi‘ ve’l-işrîn min-şuhûr Rebî‘i’l-âhir li-sene ihdâ ve semânîn ve elf.

Şuhûdü’l-hâl: Hüseyin Efendi b. Abdülfettah, Receb Halîfe b. Hüsam el-müezzin, Ahmed Çelebi b. Hüseyin, el-Hâc Sinan b. Ahmed, Mehmed Reis b. Sinan, el-Hâc Hasan b. Abdullah, Ramazan Bey b. Abdullah, Dilaver Bey b. Abdullah