|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 161 Hüküm no: 249 Orijinal metin no: [112-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Râbia Hanım’ın cariyesini kitabet yoluyla azat ettiği
Mahmiye-i İstanbul’da Ali Paşa-yı Atîk mahallesinde sâkine fahrü’l-muhadderât Râbia Hanım bt. Mehmed Ağa tarafından husûs-ı âti’l-beyânı ikrâra vekîl olup hasm-ı şer‘î-i câhid mahzarında müşârün-ileyhânın zâtını ma‘rifet-i şer‘iye ile ârifân olan Mehmed Bey b. Ali ve Şa‘ban Bey b. Hüseyin nâm kimesneler şehâdetleriyle şer‘an vekâleti sâbite olan Mehmed Efendi b. Süleyman nâm kimesneler meclis-i şer‘-i şerîfde rıkkıyetini müvekkile-i müşârün-ileyhâya mu‘terife olan orta boylu, açık kaşlı sarı elâ gözlü, Rusiyyetü’l-asl işbu sahibetü’l-kitâb Gülistan bt. Abdullah nâm câriye muvâcehesinde bi’l-vekâle ikrâr ve takrîr-i kelâm edip müvekkile-i müşârün-ileyhâ mezbûre Gülistan’ı târih-i kitâbdan iki sene tamamına dek hizmet etmek üzere kitâbete kesip ba‘de hulûlü’l-vakt mâlımdan âzad olup sâir ahrâr-ı asliyât gibi hürre olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’s-sâdis min-Cumâdelûlâ li-sene ihdâ ve semânîn ve elf.
Şuhûdü’l-hâl: Dumlu Bey b. Musa Paşa, Ahmed Bey b. Musa Paşa, Mehmed Bey b. İsa, Musa Bey b. Ahmed Ağa, İbrahim Bey b. İsmail, Hüseyin Bey b. Abdülfettah, Ramazan Bey b. Abdullah, Dilaver Bey b. Abdullah, Hüseyin b. Abdülkadir ve gayruhum
|