.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 161
Hüküm no: 250
Orijinal metin no: [112-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Benhas v. Yaşova’nın evini Salamon’a sattığı

Havâss-ı aliyye kazâsı muzâfâtından kasaba-i Hasköy’de Keçeci mahallesinde sâkin Benhas v. Mu‘allim Yaşova tarafından bey‘-ı âti’l-beyânı ikrâra vekîl olup hasm-ı şer‘î-i câhid mahzarında Şeban v. Yasef ve İsak v. Niko nâm Yahûdiler şehâdetleriyle şer‘an vekâleti sâbite olan Biram v. İsak nâm Yahûdî mahfil-i şer‘-i şerîfde râfi‘u’r-rakīm Salamon v. İsak nâm Yahûdî muvâcehesinde bi’l-vekâle ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhinde [113] münselik emlâkinden mahalle-i mezbûrede vâki‘ bir tarafı Manolaki mülkü ve bir tarafı Avraham v. Mosi mülkü ve iki tarafı müvekkil-i mezbûr Benhas’ın âhar mülkü ile mahdûd iki bâb fevkānî ve iki bâb tahtânî odaları ve müşterek iki zokak kapısı ve müşterek bi’r-i mâ’ ve fırın ve tûlen ve arzan oda yerleri ile ma‘an iki yüz seksen zirâ‘ arsayı müştemil mülk menzili bi-cümleti’t-tevâbi‘ ve’l-levâhık mezbûr Salamon’a iki yüz seksen yedi guruşa tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm edip ol dahi vech-i muharrer üzere iştirâ ve tesellüm ettikden sonra semeni olan meblağ-ı mezbûr iki yüz seksen esedî guruşu yedinden tamamen ahz ü kabz eyledim ba‘de’l-[yevm] menzil-i mahdûd-ı mezkûrede ve arsa-i hâliyede asla alâka ve medhalim yokdur, mezbûr Salamon’un mülk-i müşterâsı olmuşdur, keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘iye menzil-i mezkûrun derkine işbu hâzırûn bi’l-meclis vekîl-i mezbûr Biram ile müvekkil-i mezbûrun zevcesi Horşini bt. Yako ve kayınanası Sadanya bt. Kemol nâm Yahûdiyeler kefîl ve zâmin oldu dediklerinde mâ-hüve’l-vâki‘ ketb olundu.

Tahrîren fi’l-yevmi’s-sâlis aşer min-şehri Rebî‘i’l-âhir li-sene ihdâ ve semânîn ve elf.

Şuhûdü’l-hâl: Mehmed Çavuş b. Abdullah, Davud Çavuş b. Şa‘ban, Mehmed b. Abdullah, Musa b. Şa‘ban, Abdülbaki Çelebi b. Ahmed Efendi, Mustafa b. Zeynel, Ali b. Abdullah, Dilaver b. Abdullah, Mehmed b. Şa‘ban, Hasan b. Ömer, Abdullah Çelebi b. ( ) el-müezzin