|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 162 Hüküm no: 251 Orijinal metin no: [113-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Benhas v. Yaşova’nın evini Saltana’ya sattığı
Havâss-ı aliyye kazâsı muzâfâtından kasaba-i Hasköy’de Keçeci mahallesinde sâkin Benhas v. Mu‘allim Yaşova nâm Yahûdî tarafından ikrâr-ı âti’l-beyâna vekîl olup hasm-ı şer‘î-i câhid mahzarında Şeban v. Yasef ve İsak v. Yako nâm Yahûdiler şehâdetleriyle şer‘an vekâleti sâbite olan Biram v. İsak nâm Yahûdî meclis-i şer‘-i şerîfde râfi‘atü’l-vesîka Saltana bt. Mosi nâm Yahûdî tarafından tasdîka vekîl olup nehc-i şer‘î üzere vekâleti sâbite olan Salamon v. İsak muvâcehesinde bi’l-vekâle ikrâr ve i‘tirâf edip silk-i mülk-i sahîhinde münselik olan emlâkinden mahalle-i mezbûrede vâki‘ bir tarafı Salamon mülkü ve bir tarafı Avraham mülkü ve iki tarafı müvekkil-i mezbûr Benhas mülkü ile mahdûd iki bâb fevkānî ve iki bâb tahtânî odaları ve fırını ve iki zokak kapısı ve müşterek kapı ve bennâ zirâ‘ı ile iki yüz on zirâ‘ <> oda yerleri ile müvekkile-i mezbûre Saltana’ya iki yüz on esedî guruşa cem‘-i tevâbi‘ ile bey‘ ve teslîm müvekkile-i mezbûre dahi minvâl-i muharrer üzere iştirâ ve tesellüm ve kabz ve kabûl eyledikden sonra semeni olan meblağ-ı mezbûr iki yüz on esedî guruşu yedinden tamamen ahz ü kabz eyledim, min-ba‘d menzil-i mezkûrede alâka ve medhalim yokdur, mezbûr Saltana’nın mülk-i müşterâsı olmuşdur, keyfe mâ teşâ’ mutasarrıfa olsun dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’s-sâlis aşer min-şehri Rebî‘i’l-âhir li-sene ihdâ ve semânîn ve elf.
Şuhûdü’l-hâl: Mehmed Çavuş b. Abdullah, Mehmed Efendi b. Mustafa el-imâm, Abdülbaki Çelebi b. Mehmed Efendi, Ramazan Bey b. Abdullah, Mehmed Çelebi b. Ali, Dilaver Bey b. Abdullah, Davud Çavuş b. Şa‘ban, Mehmed Çelebi b. Abdullah, İbrahim Çelebi b. Dilaver, Ali Çelebi b. Abdullah
|