.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 164
Hüküm no: 254
Orijinal metin no: [115-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefat eden Rıdvan b. Abdullah’ın küçük oğlu Mehmed’e nafaka tayini

Havâss-ı aliyye kazâsı muzâfâtından kasaba-i Hasköy’de el-Hâc Şa‘ban mahallesinde sâkin iken bundan akdem vefât eden Rıdvan b. Abdullah nâm kimesnenin sulbî oğlu Mehmed nâm sagīrin vâlidesi ve mürebbiyesi olan işbu bâ‘isetü’l-kitâb Havva bt. Abdullah nâm Hatun meclis-i şer‘-i şerîfde takrîr-i kelâm edip sagīr-i mezbûra babası müteveffâ-yı mezbûr muhallefâtından irs-i şer‘le intikāl eden malından nafaka ve kisve ve sâir mühimmât-ı lâzımesi’çün yevmî altışar akçe nafaka takdîr olunmak taleb ederim dedikde hâkim-i muvakkı‘u’l-kitâb vech-i meşrûh üzere sagīr-i mezbûra babası müteveffâ-yı merkūmdan intikāl eden malından nafaka ve kisvesi ve sâir harc-ı lâzımesi için târih-i kitâbdan yevmî altışar akçe nafaka takdîr edip inde’l-ihtiyâc istidâneye ve vakt-i zaferde rücû‘a mezbûre Havva’ya izin verilmeğin mâ-vaka‘a bi’t-taleb ketb olundu.

Tahrîren fi’l-yevmi’l-hâmis aşer min-Cumâdelûlâ li-sene ihdâ ve semânîn ve elf.

Şuhûdü’l-hâl: Hüseyin Efendi b. Abdülfettah, Abdülbaki Çelebi b. Ahmed Efendi, Mehmed Bey b. Ahmed, Mehmed Bey b. Ali, Dilaver Bey b. Abdullah