|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 166 Hüküm no: 257 Orijinal metin no: [116-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Merhûm Musa Paşa’nın kızı Rukiye Hanım’ın evini Hüseyin Ağa’ya sattığı
Husûs-ı âti’l-beyânı tahrîr iltimâs olunmağın bu hakīr Havâss-ı aliyye kazâsı muzâfâtından kasaba-i Hasköy’de Pîrî Paşa mahallesinde sâkine fahrü’l-muhadderât Rahime Hanım’ın menziline varılıp zeyl-i kitâbda mastûrü’l-esâmî olan Müslimîn huzûrunda akd-i meclis-i şer‘-i şerîf olundukda yine müşârün-ileyhânın kız karındaşları fahrü’l-muhadderât tâcü’l-mestûrât aliyyetü’z-zât safiyyetü’s-sıfât Rukiye Hanım bt. el-merhûm Musa Paşa hazretleri meclis-i ma‘kūdda yine kasaba-i mezbûrede Kiremitçi Ahmed Çelebi mahallesinde sâkin fahrü’l-akrân işbu sahibü’l-kitâb Hüseyin Ağa b. Muharrem nâm kimesne muvâcehesinde ikrâr ve takrîr-i kelâm edip silk-i mülkümde münselik olan emvâlden mahalle-i mezbûrede vâki‘ dâhiliyesinin bir tarafı ba‘zan Ahmed Ağa mülkü ve bir taraf-ı tarîk-i âm ve bir tarafı Yahûdî kazmacıları mülkleri ve bir tarafı hâriciyesi olup dört bâb fevkānî ve iki bâb tahtânî ve bir fevkānî hamamı ve bi’r-i mâyı ve [bir] matbahı ve bir kenîfi ve eşcâr-ı müsmire ve gayri müsmire bağçeyi müştemil menzilimi ve hâriciyesinin bir tarafı Kadri Çelebi mülkü ve bir tarafı Rahime Hatun mülkü ve yine menzil-i mezbûrun dâhiliyesi ve bir tarafı tarîk-i âm ile mahdûd iki bâb fevkānî ve bir ıstabl ve bir samanlığı ve iki bi’r-i mâyı eşcâr-ı müsmire ve gayri müsmire bağçeyi ve kenîfi müştemil mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Hüseyin Ağa’ya bin dört yüz otuz esedî guruşa bey‘-ı bâtt-ı sahîh-i şer‘î ile bey‘ ve teslîm edip ol dahi vech-i muharrer üzere iştirâ ve tesellüm ettikden sonra semen olan meblağ-ı mezbûr bin dört yüz otuz esedî guruşu tamamen yedinden ahz ü kabz eyledim, ba‘de’l-yevm menzil-i mahdûd-ı mezkûrun hâriciyesi ve dâhiliyesi ve bağçeleri cümlesi mülk-i müşterâsıdır, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘iye müşârün-ileyhânın oğlu işbu hazır bi’l-meclis Musa Bey b. Mehmed Ağa nâm şâbb-ı emred menzi[l]-i mahdûd-ı mezkûrda benim dahi kat‘a alâka ve medhalim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’s-sâmin aşer min-Cumâdelûlâ li-sene ihdâ ve semânîn ve elf.
Şuhûdü’l-hâl: Mehmed Efendi b. Süleyman, Mehmed Efendi b. Mustafa el-imâm, Abdülbaki Çelebi b. Ahmed Efendi, Ramazan Bey b. Abdullah, es-Seyyid Ahmed Çelebi b. es-Seyyid Hasan, Fahrü’l-akrân Mustafa Bey b. Musa Paşa, Fahrü’l-a‘yân Ahmed Bey b. Musa Paşa, Fahrü’l-eşbâh Mehmed Bey b. Musa Paşa, Musa Bey b. Mehmed Ağa ve gayruhum
|