|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 167 Hüküm no: 258 Orijinal metin no: [116-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Rukiye Hanım’ın Hüseyin Ağa’ya sattığı evde çocukları Musa Bey ve Kerime Hatun’un alakaları olmadığına dair ikrarları
Husûs-ı âti’l-beyânı tahrîr iltimâs olunmağın bu hakīr Havâss-ı aliyye kazâsı muzâfâtından kasaba-i Hasköy’de Pîrî Paşa mahallesinde sâkine fahrü’l-muhadderât Rahime Hanım bt. Musa Paşa menziline varılıp zeyl-i kitâbda mastûrü’l-esâmî olan Müslimîn huzûrunda akd-i meclis-i şer‘-i şerîf olundukda yine menzil-i mezbûrede sâkin Musa Bey ve kız karındaşı Kerîme Hanım ibneyi’l-merhûm Mehmed Ağa nâm kimesneler meclis-i ma‘kūdda yine kasaba-i mezbûr[da] Kiremitçi Ahmed Çelebi mahallesinde sâkin fahrü’l-a‘yân işbu sahibü’l-kitâb Hüseyin Ağa b. Muharrem nâm kimesne muvâcehesinde herbiri ikrâr ve takrîr-i kelâm edip mahalle-i mezbûrda vâki‘ lede’l-ahâlî ve’l-cîrân ma‘lûmü’l-hudûd menzilini merkūm vâlidem Rukiye Hanım mezbûr Hüseyin’e bin dört yüz otuz esedî guruşa bey‘ ve teslîm edip meblağ-ı mezbûru bi’t-tamam ahz ü kabz eylemişdir, menzil-i mezbûrda kat‘a bizim alâka ve medhalimiz yokdur ve pederimiz merhûm Mehmed Ağa’nın dahi alâkası yoğidi, vâlidemiz kendi malıyla iştirâ eylemiş idi, menzil-i merkūma müte‘allik da‘vâ ve nizâ‘ımız yokdur, da‘vâ dahi edersek lede’l-hükkâmi’l-kirâm mesmû‘a ve makbûle olmasın dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’l-hâmis ve’l-işrîn min-Cumâdelûlâ li-sene ihdâ ve semânîn ve elf.
Şuhûdü’l-hâl: Mehmed Efendi b. Mustafa, el-Hâc Hüseyin Ağa b. Nasuh, İslam Çavuş b. Hüseyin, Dilaver Bey b. Abdullah
|