|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 167 Hüküm no: 259 Orijinal metin no: [117-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefat eden Hatice Hatun’un mahalle mescidine mermer musluk alınmasını vasiyet ettiği
Havâss-ı aliyye kazâsı muzâfâtından kasaba-i Hasköy’de el-Hâc Şa‘ban Mahallesi Vakfı’na bi’l-fi‘il mütevellî olan işbu bâ‘isü’l-kitâb fahrü’l-a‘yân Abdülbaki Çelebi b. Ahmed’i mahfil-i kazâda yine kasaba-i mezbûrede Pîrî Paşa mahallesinde sâkin Hüseyin b. Mehmed nâm kimesne muvâcehesinde üzerine da‘vâ ve takrîr-i kelâm edip târih-i kitâbdan on dört ay mukaddem mahalle-i merkūmede sâkine iken bundan akdem vefât eden kızı Hadîce bt. mezbûr Hüseyin nâm hatun mahalle-i mezbûre mescid-i şerîfine âbdest için etyab-ı mâlımdan beş bin akçeye bir mermer musluk alıp mescid-i mezbûrun kurbüne vaz‘ olunup ve cümle mahalleli hasbî nâzır olsunlar deyü vasiyet edip musırrân fevt olup sülüs dahi müsâ‘id iken vermede ta‘allül eder suâl olunup vakıf musluk için alıverilmek matlûbumdur dedikde gıbbe’s-suâl mezbûr Hüseyin cevâbında fi’l-vâki‘ kazıyye minvâl-i muharrer üzere olup mahalle-i mezkûre mescidine âbdest için beş bin akçeye bir mermer musluk alınıp konsun deyü vasiyet edip musırrân fevt oldu ve sülüs dahi müsâ‘iddir deyü bi-tav‘ihiikrâr ve i‘tirâf etmeğin müteveffâ-yı mezbûrenin malından bir mermer musluk için beş bin akçeyi vermeye tenbîh birle mâ-vaka‘a bi’t-taleb ketb olundu.
Tahrîren fi’l-yevmi’l-hâmis ve’l-işrîn min-Cumâdelûlâ li-sene ihdâ ve semânîn ve elf.
Şuhûdü’l-hâl: Ramazan Bey b. Abdullah, Ebûbekir Çelebi b. <> Hasan, Dilaver Bey b. Abdullah, Mehmed Bey b. Ahmed, Mehmed Efendi b. Mustafa el-imâm, Hüseyin Efendi b. Abdülfettah, Ömer Çelebi b. Mehmed, Ahmed Çelebi b. Abdullah ve gayruhum
|