.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 171
Hüküm no: 264
Orijinal metin no: [119-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mustafa Çelebi’nin evdeki hissesini kardeşi Hüseyin Çelebi’ye sattığı ve yine onda bulunan alacağını da tahsil ettiği

Havâss-ı aliyye kazâsı muzâfâtından kasaba-i Hasköy’de el-Hâc Şa‘ban mahallesinde sâkin Mustafa Çelebi b. Ahmed Bey nâm kimesne meclis-i şer‘-i şerîfde yine mahalle-i mezbûrede sâkin li-ebeveyn karındaşı işbu sahibü’l-kitâb Hüseyin Çelebi nâm kimesne muvâcehesinde ikrâr ve takrîr-i kelâm edip bundan akdem vefât eden vâlidemiz Hadîce nâm hatunun muhallefâtından olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk-i mevrûsumuz olan menzilden irs-i şer‘le bana intikāl eden dört sehimden bir sehim hisse-i şer‘iyemi birâderim mezbûr Hüseyin Çelebi’ye bin dört yüz elli akçeye bey‘-ı bâtt-ı sahîh-i şer‘î ile bey‘ ve teslîm eyledim, ol dahi minvâl-i muharrer üzere iştirâ ve tesellüm ettikden sonra semen olan meblağ-ı mezbûr bin dört yüz elli akçeyi tamamen yedinden ahz ü kabz eyledim dedikde gıbbe’t-tasdîk ve yine birâderim mezbûr Hüseyin Çelebi’de cihet-i karz-ı şer‘îden yedi yüz elli akçe hakkım var idi, onu dahi bi’t-tamam ahz ü kabz eyledim, zikrolunan menzile ve yedi yüz elli akçeye müte‘allik da‘vâdan birâderim merkūm Hüseyin Çelebi’nin zimmetini ibrâ-i âmm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Tahrîren fi’l-yevmi’s-sânî aşer min-Saferü’l-hayr li-sene ihdâ ve semânîn ve elf.

Şuhûdü’l-hâl: Ali Efendi b. el-Hâc Mehmed el-hatîb, Abdülbaki Çelebi b. Ahmed Efendi, Mehmed Bey b. Ahmed, Şorbacı Hüseyin Bey, Şa‘ban Dede b. Hızır, Hasan Çelebi b. Süleyman, Dilaver Bey b. Abdullah, Mahmud Çelebi b. Mehmed, İbrahim Çelebi b. Dilaver ve gayruhum