.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 171
Hüküm no: 265
Orijinal metin no: [119-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Gürcü Mihal’in evini sattığı

Havâss-ı aliyye kazâsı muzâfâtından kasaba-i Hasköy’de Kiremitçi Ahmed Çelebi mahallesinde sâkin Gürcü Mihal v. Yani nâm zimmî meclis-i şer‘-i şerîfde yine mahalle-i mezbûrede sâkin işbu bâ‘isü’s-sifr Yani v. Erkiri nâm zimmî muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafı Yahûdiler sinadları ve bir tarafı mumhâne ve bir tarafı yine bâyi‘-i mezbûr mülkü ve bir tarafı tarîk-i âm ile mahdûd arsası tûlen dokuz ve arzan dokuz zirâ‘ bir bâb tahtânî menzili ve müşterek bi’r-i mâyı ve kenîfi müştemil mülk menzilimi cümle tevâbi‘ ve levâhıkı ile mezbûr Yani’ye üç yüz esedî guruşa bey‘-ı bâtt-ı sahîh-i şer‘î ile bey‘ ve teslîm eyledim, ol dahi minvâl-i muharrer üzere iştirâ ve tesellüm eyledikden sonra semen olan meblağ-ı mezbûr üç yüz esedi guruşu tamamen yedinden ahz ü kabz eyledim, ba‘de’l-yevm menzil-i merkūm mezbûr Yani’nin mülk-i müşterâsıdır, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Tahrîren fi’l-yevmi’l-hâmis aşer min-Saferü’l-hayr li-sene ihdâ ve semânîn ve elf.

Şuhûdü’l-hâl: Mehmed Bey b. Ali, Ali Çelebi b. Hasan, İbrahim Beşe er-râcil, Yusuf b. Abdullah, Dilaver Bey b. Abdullah, Mahmud Çelebi b. Mehmed, Manolaki v. Egali, Kurt v. Egali, Dimo v. (...) [ve] gayruhum