.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 172
Hüküm no: 266
Orijinal metin no: [120-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Yani, Tonoş ve Dimo’nun meyhanedeki gedik hisselerini sattıkları

Havâss-ı aliyye kazâsı muzâfâtından kasaba-i Hasköy’de sâkin meyhâneci tâifesinden Yani v. Kiryazi ve Tonoş v. Nikola ve Dimo v. Nikola nâm zimmîler meclis-i şer‘-i şerîfde yine tâife-i mezbûreden kasaba-i mezbûrede sâkin işbu sahibü’l-kitâb Petro v. Tarandafilo nâm zimmî muvâcehesinde herbiri ikrâr ve takrîr-i kelâm edip kasaba-i mezbûrede Kiremitçi Ahmed Çelebi mahallesinde vâki‘ lede’l-ahâlî ve’l-cîrân ma‘lûm Bağçeli Meyhâne demekle ma‘rûf meyhânede gedik ve peştemallık ta‘bîr olunur beş hisseden üç hissemizi içinde olan âlât-ı meyhâneden on sekiz fıçı ve otuz vakıyye bakır evânî ve altmış aded iskenbe ve yirmi ağaç sini ve sâir beynimizde ma‘lûm âlâtı cümle tevâbi‘ ve levâhıkı ile mezbûr Petro’ya yüz yirmi esedî guruşa bey‘-ı bâtt-ı sahîh-i şer‘î ile bey‘ ve teslîm eyledik, ol dahi minvâl-i muharrer üzere iştirâ ve tesellüm ettikden sonra semen olan meblağ-ı mezbûr yüz yirmi guruşu tamamen yedinden ahz ü kabz eyledik, ba‘de’l-yevm eşyâ-i mezkûr, mezbûr Petro’nun mülk-i müşterâsıdır, keyfe mâ yeşâ’ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Tahrîren fî’l-yevmi’t-tâsi‘ aşer min-Saferü’l-hayr li-sene ihdâ ve semânîn ve elf.

Şuhûdü’l-hâl: Ramazan Bey b. Abdullah, Dilaver Bey b. Abdullah, Mahmud Çelebi b. Mehmed, Hüseyin b. Abdülgaffar, İbrahim Çelebi b. Dilaver, Vartan v. Babek, Bağdasar v. Kasber, Yorgaki v. Nikola, Avaniz v. Bircan, Arzuman v. Covan, Bağdasar v. Sahak, Markor v. Ercan, Koti v. Manol, Yasef v. Papula, Palaş v. Koti, Yani v. Kostantin