|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 172 Hüküm no: 267 Orijinal metin no: [120-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Andriya’nın Bahçeli Meyhâne adlı meyhanedeki gedik hissesini sattığı
Havâss-ı [aliyye] kazâsı muzâfâtından kasaba-i Hasköy’de sâkin meyhâneci tâifesinden Andriya v. Penayot nâm zimmî meclis-i şer‘-i şerîfde yine tâife-i mezbûreden kasaba-i mezbûrede sâkin işbu sahibü’s-sifr Atanaş v. Yorgi nâm zimmî muvâcehesinde ikrâr ve takrîr-i kelâm edip kasaba-i merkūmede Kiremitçi Ahmed Çelebi mahallesinde vâki‘ lede’l-ahâlî ve’l-cîrân ma‘lûmü’l-hudûd Bağçeli Meyhâne demekle ma‘rûf meyhânede gedik ve peştemallık ta‘bîr olunur beş hisseden bir hissemi içinde olan âlât-ı meyhâneden altı fıçı ve yirmi iskenbe ve beş ağaç sini ve on vakıyye evânî ve sâir beynimizde ma‘lûm meyhâne [âlâtını] cümle tevâbi‘ ve levâhıkı ile mezbûr Atanaş’a kırk esedî guruşa bey‘-ı bâtt-ı sahîh-i şer‘î ile bey‘ ve teslîm eyledim ol dahi minvâl-i muharrer üzere iştirâ ve tesellüm ettikden sonra semen olan meblağ-ı mezbûr kırk esedî guruşu tamamen yedinden ahz ü kabz eyledim, ba‘de’l-yevm zikrolunan eşyâ ve gedik mezbûr Atanaş’ın mülk-i müşterâsıdır, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.
Tahrîren fi’l-yevmi’t-tâsi‘ aşer min-Saferü’l-hayr li-sene ihdâ ve semânîn ve elf.
Şuhûdü’l-hâl: Ramazan Bey b. Abdullah, Dilaver Bey b. Abdullah, Mahmud Çelebi b. Ahmed, İbrahim Çelebi b. Dilaver, Hüseyin b. Abdülkadir, Vartan v. Babek, Bağdasar v. Kasber, Yorgaki v. Nikola, Avaniz v. Mircan, Arzuman v. Covan, Bağdasar v. Sahak, Markor v. Mircan, Foti v. Melal, Yasef v. Papula, Palaş v. Foti, Yani v. Kostantin, Nehaker v. Kasat, Yorgi v. Penayot
|