|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 173 Hüküm no: 268 Orijinal metin no: [121-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Rukiye Hanım’ın Girit’te şehit olan kocasının zimmetindeki mehir alacağı için vekâlet verdiği
Havâss-ı aliyye kazâsı a‘mâlinden kasaba-i Hasköy mahallâtından Pîrî Paşa mahallesinde sâkine umdetü’l-muhadderât Rukiye Hanım bt. el-merhûm Musa Paşa tarafından sulh ve ibrâya ve bedel-i sulhü ahz ü kabz ve kendüye irsâle vekîl olup vekâleti Mehmed Bey b. Ali ve Şa‘ban Bey b. Hüseyin nâm kimesneler şehâdetleri ile şer‘an sâbite olan müvekkile-i müşârün-ileyhânın li-ebeveyn karındaşı Mustafa Bey meclis-i şer‘-i şerîfde işbu sahibü’l-kitâb Mahmud Bey b. Musa Paşa tarafından tasdîke vekîl olup vekâleti nehc-i şer‘î üzere sâbite olan fahrü’l-a‘yân Ahmed Ağa b. Hüseyin nâm vekîl muvâcehesinde bi’l-vekâle ikrâr ve i‘tirâf edip bundan akdem müvekkile-i müşârün-ileyhânın zevci olup cezîre-i Girit’de sipâhiler ağası iken şehîden fevt olan Hüseyin Ağa’nın cemî‘ muhallefâtını kabza kıbel-i şer‘den mansûb vasî nasb olunan Mehmed Efendi’den müteveffâ-yı mezbûr zimmetinde mütekarrer ve ma‘kûdun-aleyh olan bin aded altın mehr-i müeccelinden müvekkil-i müşârün-ileyhâ Rukiye Hanım kendi tarafından Mahmud Bey’i vekîl edip ol dahi vekâleten cezîre-i mezbûreye varıp vasî-i merkūm Mehmed Efendi yedinden bin aded altından dört yüz esedî guruşu ahz ü kabz edip meblağ-ı mezbûr dört yüz esedî guruşu müvekkile-i mezbûreye irsâl etmeyip meblağ-ı mezbûru vekîl-i merkūm Mahmud Bey kendi mesârifine sarfla istihlâk etmekle meblağ-ı mezbûru müvekkile-i mezbûre merkūm Mahmud Bey’den da‘vâ ve taleb eylediğimde ol dahi meblağ-ı mezbûrun ahz ü kabzını ve kendi mesârifine sarfla istihlâk eylediğini ikrâr etmeğin beynlerinde münâza‘ât-ı kesîre vukū‘undan sonra beynlerine muslihûn ve Müslimûn tavassut etmekle el-hâletü hâzihî müvekkile-i müşârün-ileyhâ Rukiye Hanım merkūm Mahmud Bey ile yüz elli kıt‘a esedî guruş üzerine inşâ-i akd-i sulh eylediklerinde ol dahi sulh-i mezbûru kabûl ve bedel-i sulh olan meblağ-ı mezbûr yüz elli esedî guruşu yedinden tamamen ahz ü kabz eyledim min-ba‘d müvekkil-i merkūm Mahmud Bey ile ziyâde iki yüz elli esedî guruşdan zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedi dedikde gıbbe’t-tasdîk mâ-vaka‘a ketb olundu.
Fi’l-yevmi’r-râbi‘ şehri Recebi’l-ferd li-sene ihdâ ve semânîn ve elf.
Şuhûdü’l-hâl: Hüseyin Efendi [b.] Abdülfettah, İbrahim Bey b. İsmail, Ömer Beşe b. Hızır, Dilaver Bey b. Abdullah, Sefer Bey b. Abdullah, İbrahim Çelebi [b.] Dilaver
|