.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 174
Hüküm no: 269
Orijinal metin no: [121-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mehmed b. Mustafa’nın Sinan Bey’den satın aldığı evi Sinan Bey’in tekrar sattığı; Mehmed b. Mustafa’nın ödediği parayı geriye alıp davadan feragat ettiği

Havâss-ı aliyye kazâsına tâbi‘ Hasköy mahallâtından Turşucu mahallesinde sâkin Mehmed b. Mustafa meclis-i şer‘de râfi‘u’l-vesîka Ömer b. Mehmed mahzarında ikrâr ve takrîr-i kelâm edip bundan akdem mahalle-i mezbûre sâkinlerinden olup işbu hazır bi’l-meclis Sinan Bey b. Abdullah el-bevvâbü’s-sultânî nâm kimesne silk-i mülk-i sahîhinde münselik emlâkinden mahalle-i mezbûrede vâki‘ iki tarafı Mehmed b. Muslihiddin mülkü ve bir tarafı Muslı b. Veli mülkü ve bir tarafı tarîk-i âm ile mahdûd üç bâb fevkānî oda ve tahta-pûş [122] ve kilâr ve kenîfi müştemil mülk menzilini bana on bin nakd-i râyic fi’l-vakt akçeye bey‘ ve teslîm ben dahi vech-i muharrer üzere iştirâ ve kabûl ve kabz eyleyip semeni olan meblağ-ı mezbûrdan bin akçesini kendüye def‘ ve teslîm edip bâkī dokuz bin akçeyi vermezden mukaddem menzil-i mahdûd-ı mezkûru merkūm Ömer’e mârrü’z-zikr on bin akçeye bey‘-ı kat‘î ile bey‘ edip ol dahi iştirâ ve kabûl ve kabz eyleyip semeni olan meblağ-ı mezbûru merkūm Sinan Bey müşteri-i mezbûr Ömer yedinden ahz ü kabz edip menzil-i mezkûr mülk-i müşterâsı olmağla ben dahi menzil-i mezkûru merkūm Sinan Bey’den mezbûr Ömer’den mukaddem bana bey‘ eyledin deyü da‘vâ sadedinde iken beynimize muslihûn tavassut etmekle beni menzil-i mezkûr da‘vâsından fâriğa eylediklerinde mukaddemâ merkūm Sinan Bey’e verdiğim akçeyi yedinden ahz ü kabz eyleyip min-ba‘d menzil-i mahdûd-ı mezkûrda alâka ve medhalim yokdur, merkūm Sinan Bey’in merkūm Ömer’e bey‘ini bi’l-muvâcehe tasdîk eyledim, menzil-i mezkûr merkūm Ömer Bey’in mülk-i müşterâsı olmuşdur, keyfe mâ yeşâ’ mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu.

Fi’l-yevmi’l-hâmis aşer min-şehri Receb li-sene ihdâ ve semânîn ve elf.

Şuhûdü’l-hâl: Muharrem Çelebi [b.] Şa‘ban, Mustafa Çelebi [b.] Dilaver, Mehmed [b.] Siyavuş, Süleyman [b.] Abdullah, Ali b. Abdullah, İbrahim b. Halil, Aydın [b.] Mehmed