.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 176
Hüküm no: 274
Orijinal metin no: [123-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Benhas v. Muallim’in evini kız kardeşi Sinorile bt. Muallim’e sattığı

Havâss-ı aliyye kazâsı muzâfâtından kasaba-i Hasköy’de Keçeci mahallesinde sâkin Benhas v. Mu‘allim nâm Yahûdî tarafından bey‘-ı âti’l-beyânı ikrâra vekîl-i müseccel olan Barim v. İsak nâm Yahûdî meclis-i şer‘-i şerîfde müvekkil-i mezbûr kız karındaşı işbu sahibetü’s-sifr Sinorile bt. Mu‘allim nâm Yahûdiyye muvâcehesinde bi’l-vekâle ikrâr ve takrîr-i kelâm edip mahalle-i mezbûrede vâki‘ iki tarafı mezbûr Benhas mülkü ve bir tarafı Küpelioğlu Salamon mülkü ve bir tarafı tarîk-i âm ile mahdûd iki bâb fevkānî odaları ve bir selâmlığı vasatında iki bâb odaları ve bir matbahı ve bir çardağı ve tahtânî iki bâb odaları ve bir matbahı ve tûlen ve arzan kırk sekiz zirâ‘ arz-ı hâliyeyi ve müşterek zokak kapısı ve müşterek bi’r-i mâları ve kenîfi müştemil mülk-i mevrûsum olan menzilimi cümle tevâbi‘ ve levâhıkı ile târih-i kitâbdan on ay mukaddem üç yüz esedî guruşa mezbûre Sinorile’ye bey‘-ı bâtt-ı sahîh-i şer‘î ile bey‘ ve teslîm eyledim, ol dahi minvâl-i muharrer üzere iştira ve tesellüm ve kabûl ve kabz ettikden sonra semeni olan meblağ-ı mezbûr üç yüz esedî guruşu yedinden tamamen ahz ü kabz eyledim, ba‘de’l-yevm mezbûre Sinorile’nin mülk-i müşterâsıdır, keyfe mâ teşâ’ ve tehtâr mutasarrıfe olsun dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Tahrîren fi’l-yevmi’l-hâmis aşer min-şehri Rebî‘i’l-âhir li-sene ihdâ ve semânîn ve elf.

Şuhûdü’l-hâl: Hüseyin Efendi b. Abdülfettah, Mehmed Efendi b. Mustafa el-imâm, Abdülbaki Çelebi b. Ahmed Efendi, Ramazan Bey b. Abdullah, Mehmed Çelebi b. Abdullah, Dilaver Bey b. Abdullah, Ahmed Çelebi b. Hüseyin, Mehmed Çelebi b. Pîrî Çelebi, Hüseyin b. Abdülkadir ve gayruhum