.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 176
Hüküm no: 275
Orijinal metin no: [123-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Benhas v. Muallim’in vefat eden babasından intikal eden mirasını almak için vekil tayin ettiği

İşbu bâ‘isü’l-vesîka Barim v. İsak nâm Yahûdî’den vech-i âtî üzere da‘vâ-yı sahîha-i şer‘iye ile mesbûk istişhâd-ı şer‘î sudûrundan sonra Portugal cemâ‘atinden İsak v. Yako ve Şeban v. Yasef nâm Yahûdiler li-ecli’ş-şehâde meclis-i şer‘a hâzırân olup isre’l-istişhâd Havâss-ı aliyye kazâsı muzâfâtından kasaba-i Hasköy’de Keçeci mahallesinde sâkin iken bundan akdem mürd olup verâseti zevcesi Saltana bt. Mosi nâm Yahûdiye ile sulbî kebîr oğlu Benhas nâm Yahûdiye ve sulbiye kebîre kızları Rahile ve Sinorile nâm Yahûdiyelere [münhasıra] oldukda Yaşova Mu‘allim v. Benhas nâm Yahûdî’nin oğlu merkūm Benhas babası hâlik-i merkūmdan kendüye ırsen isâbet ve intikāl eden hisse-i şer‘iyesini vâzı‘u’l-yed olan vâlidesi mezbûr ve kız karındaşları merkūmân Rahile ve Sinorile’den taleb ve da‘vâ ve ahz ü kabz ve inde’l-hâcet lede’l-hükkâmi’l-kirâm mürâfa‘a ve muhâsama ve inde’l-iktizâ sulh [ü] ibrâya ve bey‘ [ü] şirâya ve bunlar mahsûs olduğu umûrun küllîsine bizim huzûrumuzda merkūm Barim’i tarafından vekîl-i nâyib-i menâb nasb ve ta‘yîn eyledikde ol dahi vekâlet-i mezbûreyi kabûl ve hıdemât-ı lâzımesini edâya ta‘ahhüd iltizâm eyledi, biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde ba‘de ri‘âyeti şerâiti’l-kabûl şehâdetleri makbûle olmağın mâ-vaka‘a bi’t-taleb ketb olundu.

Tahrîren fi’l-yevmi’s-sâlis aşer min-şehri Rebî‘i’l-âhir li-sene ihdâ ve semânîn ve elf.

Şuhûdü’l-hâl: Mehmed Efendi b. Mustafa el-imâm, Abdülbaki Çelebi b. Ahmed Efendi, Ramazan Bey b. Abdullah, Mehmed Çelebi b. Abdullah, Dilaver Bey b. Abdullah, Mehmed Çelebi b. Kadri