.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 178
Hüküm no: 277
Orijinal metin no: [124-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ölen Yahûda v. Mosi’den kalan evin, borçlarının ödenmesi ve nafaka ihtiyacı için müzayede ile satıldığı

Havâss-ı aliyye kazâsı muzâfâtından kasaba-i Hasköy’de Keçeci mahallesinde sâkin iken bundan akdem hâlik olan Yahûda v. Mosi nâm Yahûdî’nin verâseti zevce-i metrûkesi Tamar bt. Yasef nâm Yahûdiyye ile sulbî oğlu Mosi ve kızı Kılariye nâm sagīrlere münhasıra oldukdan sonra sagīrân-ı mezbûrânın tesviye-i umûrlarına kıbel-i şer‘den mansûbe vasîleri olan dayıları Avraham v. David nâm Yahûdî ve anaları mezbûre Tamar nâm Yahûdiler meclis-i şer‘-i şerîfde işbu sahibü’s-sifr Kemol v. Yasef nâm Yahûdî muvâcehesinde herbiri asâleten ve vesâyeten ikrâr ve takrîr-i kelâm edip hâlik-i mezbûrun muhallefâtından olup mahalle-i mezbûrede vâki‘ bir tarafı Salamon v. Aslan nâm Yahûdî mülkü ve bir tarafı kâfirler mezarlığı ve bir tarafı Dimitraki zimmî mülkü ve tarîk-i âm ile mahdûd üç bâb tahtânî odaları ve bir mahzeni ve bir mikdâr arz-ı hâliyeyi ve kenîfi müştemil mülk menzilini cümle tevâbi‘ ve levâhıkı ile zarûret-i deyn ve zarûret-i nafaka için bey‘i lâzım gelmeğin sûk-ı sultâniyede mezâd ve müzâyede olunup merkūm Kemol Yahûdî üzerinde dört yüz yirmi esedî guruşa hakk-ı karâr ile karâr edip ziyâde ile tâlib-i âhar zuhûr etmemekle mezbûr Kemol Yahûdî’ye asâleten ve vesâyeten meblağ-ı mezbûr dört yüz yirmi esedî guruşa bey‘-ı bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzere iştirâ ve tesellüm ettikden sonra semen olan meblağ-ı mezbûr dört yüz yirmi esedî guruşu tamamen yedinden asâleten ve vesâyeten ahz u kabz eyledik, ba‘de’l-yevm menzil-i mahdûd-ı mezkûr merkūm Kemol Yahûdî’nin mülk-i müşterâsıdır, keyfe mâ yeşâ’ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Tahrîren fi’l-yevmi’l-aşer min-Cumâdelâhire li-sene ihdâ ve semânîn ve elf.

Şuhûdü’l-hâl: Mehmed Efendi b. Mustafa el-imâm, Abdülbaki Çelebi b. Ahmed Efendi, Ramazan Bey b. Abdullah, Dilaver Bey b. Abdullah, İbrahim b. Dilaver