|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 178 Hüküm no: 278 Orijinal metin no: [125-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Abdüsselam Bahçesi yanında deniz kenarında ölü olarak bulunan Hüseyin b. Abdullah’ın keşfi
Havâss-ı Kostantıniyye tevâbi‘inden Hasköy zâbiti olan acemioğlanı yayabaşılarından fahrü’l-akrân Murad Bey b. Abdülmennan karye-i merkūme subaşısı olan Mustafa Subaşı meclis-i şer‘-i şerîfe hâzırân olup karye-i merkūmede vâki‘ Abdüsselam Bağçesi demek ile ma‘rûf olan bağçe içinde Pervâne b. Abdullah ve Sinan b. Abdullah ve Hüseyin b. Abdullah ve Mustafa b. Abdullah ve Mehmed b. Abdullah ve Mustafa b. Abdullah ve Vaçko v. ( ) nâm kimesneler ale’l-iştirâk merkūm bağçenin meyvesin zabtedip ve içinde sâkin olurlar iken merkūm Hüseyin bağçe-i merkūme kurbünde deryâ kenarında mecrûhen maktûl bulunup zikrolunan bağçenin içinde mürde üzerine varılıp maktûl-i merkūmun ahvâli tahrîr olunmak taleb ederiz dediklerinde zeyl-i kitâbda mastûrü’l-esâmî olan Müslümânlar ile üzerine varılıp müşâhede olundukda sol koltuğunda iki yerde bıçak cerâhati ve başında eser-i cerhi olup ve bağçe içinde sâkin olduğu mevzi‘de iki aded köhne kebe ve bir köhne çakşır bulunup müştereklerinden merkūm Pervâne ve mesfûrândan? husûs-ı merkūm istifsâr olundukda maktûl-i merkūm Hüseyin bir gün mukaddem bağçe içinde âhardan bir kimesne ile oturup şurb-i hamr edip ve ol kimesne ile bağçe içinde gezerken na-bedîd oldular, kande gittiklerin bilmezin, ikinci gün hazret-i Eyüb kapısı kurbünde bahr kenarında maktûl bulunup şerîklerimizden mezbûr Mustafa Gürcü nâm bir ak sakallı peremecinin peremesine koyup ahşam namazından mukaddem getirip bizim sâkin olduğumuz bağçe <> kurbünde bahr kenarına koyup gittiler deyü cevâb verdiklerinde mezbûrların takrîrleri mâ-vaka‘a alâ-vukū‘ihî merkūmân Murad Bey ve Mustafa subaşı talebleri ile ketb ve tahrîr olunup yed-i tâlibe vaz‘ olundu.
Cerâ zâlike ve hurrira fi’l-yevmi’r-râbi‘ min-şehri Safer li-sene 1008.
Şuhûdü’l-hâl: Mustafa b. Hüseyin el-imâm, Şa‘ban b. İbrahim, Ali b. Abdullah er-râcil, Mustafa b. Abdullah, Mustafa b. Memi, Cafer b. Abdullah, Bağçe Ustası Ahmed Bey, Piyale Bey b. Abdullah el-cündî, Mustafa b. Abdullah, Mustafa ve gayruhum
|