|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 181 Hüküm no: 285 Orijinal metin no: [128-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Derviş Bey ve Mehmed Çavuş’un bahçelerini üç yıllığına kiraladığı
Havâss-ı Kostantıniyye tevâbi‘inden Hasköy’de vâki‘ Abdüsselam Bağçesi demek ile ma‘rûf olan bağçenin sahibleri olan Dergâh-ı âlî müteferrikalarından Derviş Bey ve Dergâh-ı âlî çavuşlarından Mehmed Çavuş b. Pir Ahmed Bey taraflarından vekîl olup nehc-i şer‘î üzere vekâleti sâbite olan Mustafa Bey b. el-Hâc Said ve Bostancılar kethudâsı olup bağçe ustası olan Ahmed Bey b. Abdullah mahfil-i kazâda Yorgi v. Dimo nâm zimmî muvâcehesinde ikrâr ve takrîr-i merâm edip müvekkillerimiz mezbûrân Derviş Bey ve Mehmed Çavuş’un beyne’l-ahâlî ve’l-cîrân ma‘lûmetü’l-hudûd olan mülk bağçe tasarrufunu üç yıl tamamına değin beher altı ayda dörder bin akçe verip edâ <> edip içinde şurb-i hamr ve sâir kabâhat etmemek üzere yirmi dört bin nakid ve râyic fi’l-vakt akçe[ye] ber-vech-i maktû‘ verip teslîm eyledik, ba‘de’l-yevm keyfe mâ yeşâ’ ve yehtâr mutasarrıf olsun deyip mukırrân-ı merkūmânın ber-vech-i meşrûh sudûr eden ikrârlarını mukarrun lehu’l-mezbûr Yorgi dahi vicâhen ve şifâhen tasdîk ve tahkīk ettikden sonra Hasköy sâkinlerinden Andon v. Yani nâm zimmî mezbûr Yorgi’nin nefsine emri ve kabûlü hâvî kefâletle kefîl oldum dedikden sonra mâ-hüve’l-vâki‘ bi’t-taleb ketb olunup yed-i tâlibe vaz‘ olundu.
Cerâ zâlike ve hurrira fî-gurrei Rebî‘i’l-evvel li-sene semân ve elf.
Şuhûdü’l-hâl: Mustafa b. Hüseyin el-imâm, Ali b. Hüseyin, Hasan b. Abdullah el-imâm, Ali Çelebi b. Ahmed el-mütevellî, Seydi b. Ramazan, Ahmed b. Hüsam
|