.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 182
Hüküm no: 287
Orijinal metin no: [129-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Dimitri v. Kosta evini yeniden bina ederken komşusu İsrail’in evin damlalığında mülkiyet iddiasında bulunduğu ancak bunu ıspatlayamadığı

[Yev]mi’s-sâlis min-şehri Rebî‘i’l-evvel li-sene semân ve elf.

Havâss-ı Kostantıniyye tevâbi‘inden Hasköy’de sâkin Dimitri v. Kosta nâm zimmî mahfil-i kazâya İsrail v. Vafda nâm Yahûdî’yi ihzâr ve mahzarında takrîr-i merâm edip karye-i merkūmede vâki‘ olan evimi yeniden binâ edip ve mezbûr İsrail’in evinden cânibde olan damlalığımı dahi binâ etmek istediğimde merkūm Yahûdî benim mülkümdür deyü binâ etmeye mâni‘ olur, kıbel-i şer‘den üzerine varılıp keşfolunmak murâd ederim dedikde hâssa mi‘mârlardan Üstâd Mehmed b. Abdullah ile ve zeyl-i kitâbda mastûrü’l-esâmî olan Müslümânlar ile mevzi‘-i merkūmun üzerine varılıp keşfolunup ve ahâlî-i karyeden dahi husûs-ı merkūm istifsâr olundukda Mustafa b. Hasan es-sarrâc ve Hasan b. Abdullah ve Yusuf b. Abdullah ve cem‘-i kesîr ve cemm-i gafîr zikrolunan damlalık iki yıldan mütecâvizdir mezbûr Dimitri’nin damlalığıdır ve mesfûr İsrail’in evi kenarında olan tahta havlu hâdisdir, alâ-tarîkı’ş-şehâde haber verdiklerinden sonra zikrolunan damlalık merkūm Dimitri’ye hükmolunup ve mesfûr Dimitri’nin dahi evinin arzı Bakkalzâde Vakfı’ndan mesfûr İsrail’in tahta havlusuna gelince damlalık ile ve zirâ‘-ı bennâ ile on üç zirâ‘ sekiz parmak olup ve münâza‘un-fîh olan damlalık dahi tûlen dört zirâ‘ ve arzan bir zirâ‘ sekiz parmak olup zikrolunan damlalığın arzında mesfûr İsrail’in tahta çıkmalısına? varınca on parmak iken merkūm Dimitri kendü ihtiyârı ile ferâgat edip ıslâh-ı hâl olduk dedikde bu husûsda da‘vâ edersem mesmû‘a olmaya dedikde mâ-hüve’l-vâki‘ bi’t-taleb ketb olundu.

Cerâ zâlike ve hurrira fî evâsıtı Rebî‘i’l-evvel li-sene semân ve elf.

Şuhûdü’l-hâl: Mustafa b. Hasan el-imâm, Yusuf b. Abdullah el-müezzin, Mustafa b. Abdullah er-râcil, Mustafa b. Hasan es-sarrâc, Osman b. Ömer, Mehmed b. Kasım, Hasan Beşe b. Abdullah, Muzaffer b. Abdullah, Hızır b. Ömer, Şa‘ban b. Abdullah el-muhzır