|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 186 Hüküm no: 295 Orijinal metin no: [133-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ayşe Hatun’un vakfettiği ev ve dükkânın kiralandığı
Oldur ki, Havâss-ı Kostantıniyye tevâbi‘inden Hasköy’de vâki‘ Ahmed Çelebi mahallesinde sâkine fahrü’l-muvakkarât ve zahru’l-muhadderât Âişe Hatun bt. Mehmed meclis-i şer‘-i şerîf-i şâmihü’l-bünyân ve mahfil-i dîn-i münîf-i râsihü’l-erkânda husû[s]-ı âti’z-zikri tasdîka Aleksandi ve Ezmerağda ve Zenubye nâm zimmiyeler taraflarından vekîl-i şer‘i olup Mavrodi v. Todori ve Ekmekçi Yani v. Mihal nâm zimmîler şehâdetleri ile ber-nehc-i şer‘î vekâleti sâbite olan Kiga v. Nikola nâm zimmî mahzarında tâyi‘aten ikrâr ve i‘tirâf edip Hasköy’de vâki‘ olup iki tarafı merhûm Timurhan Çavuş Vakfı ve iki tarafı tarîk-i âm ile mahdûd olan fevkānî beyt ve tahtânî bir bâb dükkân tevâbi‘i ve levâhıkı ile kayd-ı hayatda oldukça kendi nefsim ve benden sonra neslen ba‘de neslin evlâdıma vakfedip îcâr için sadrî oğlum İbrahim Çelebi’yi mütevellî eylediğimden sonra mütevellî-i mezbûr zikrolunan beyt ve dükkânı tevâbi‘ ve levâhıkı ile esâmîsi zikrolunan zimmiyelerin babaları İstemad’a îcâr için mezbûr İstemad’dan iki bin dört yüz akçe icâre-i mu‘accele alıp beher mâh yüz akçe icâre-i müeccele ile îcâr edip ol dahi vech-i meşrûh üzere istîcâr edip mutasarrıf iken mütevellî olan merkūm İbrahim fevt olup diğer sadrî oğlum İsmail Çavuş mütevellî oldukda ol dahi tecdîd-i icâre edip bi-tarîkı’l-icâreti’l-mu‘accele mezbûr İstemad yedinde iken bin dört yüz akçe aldıkdan sonra âhirete intikāl etmekle min-kıbeli’ş-şer‘i’ş-şerîf vakf-ı mezbûr tevliyeti bana tefvîz olunup ben dahi oğlum İsmail îcâr ettiği üzere ibkā edip ile’l-ân mezbûr İstemad mutasarrıf olup mâh be-mâh icâre-i müeccelesin edâ edip hâlen merkūm İstemad bu dâr-ı fânîyeden menkûsen hurûc ve kabrinde mesûlen nüzûl ettikde icâre münfesih olmağın zimmiyân-ı merkūmân taraflarından vekîl-i şer‘i olan mezbûr Kiga v. Nikola yedinden dört bin akçe icâre-i mu‘accele alıp zikrolunan beyt ve dükkânı tevâbi‘i ve levâhıkı ile târih-i kitâbdan doksan yıl tamamına eimme-i kirâmdan icâre-i tavîle tecvîz eden kavli üzere icâre-i tavîle ile mâh be-mâh yüz akçe icâre-i müeccelesin edâ edip ta‘mîr ve termîme muhtâc oldukda kendüler ta‘mîr etmek üzere îcâr eyledim dedikde vekîl-i mezbûr Kiga mukırra-i mezbûreyi ikrâr-ı meşrûhunda vicâhen tasdîk ve şifâhen tahkīk ettikden sonra mâ-hüve’l-vâki‘ [134] tahrîr olunmuşdur.
El-vâki‘ şehr.
Şuhûd
|