|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 191 Hüküm no: 309 Orijinal metin no: [139-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Korucu Mehmed’in Sultan Bâyezid Vakfı’na ait tasarrufundaki araziyi tefviz ettiği
Oldur ki, Hasköy’de el-Hâc Mehmed mahallesi sâkinlerinden işbu hâmilü’l-kitâb Korucu Mehmed b. Bâyezid nâm kimesne fahrü’l-emâsil ve’l-akrân Ahmed b. Abdülmennan nâm kimesne muvâcehesinde bi’t-tav‘i’s-sâf ikrâr ve i‘tirâf edip mezbûr Hasköy’de merhûm ve mağfûrün-leh Sultan Bâyezid Han -aleyhi’r-rahmetü ve’l-gufrân- hazretlerinin evkāfı arâzîsinde yılda yetmiş akçe mukāta‘a ile bir tarafı Okmeydânı’na ve bir tarafı İbrahim Çavuş b. Timurhan yeri ve bir tarafı Ümmü Hatun yeri ve bir tarafı tarîk-i âm ile mahdûd bennâ zirâ‘ı ile tûlen otuz dokuz ve arzan on altı zirâ‘ mezrâ‘ası ile sahib-i arz ma‘rifeti ile mezbûr Ahmed b. Abdülmennan’a yedi bin nakd-i râyic fi’l-vakt akçeye bey‘ ve tefvîz eyledim dedikde mukırr-ı mezbûrun vech-i meşrûh üzere olan ikrâr ve i‘tirâfın mukarrun lehu’l-mezkûr bi’l-muvâcehe tasdîk ve tahkīk edicek vâki‘ hâl gıbbe’t-taleb ve’s-suâl ketb ü imlâ ve yed-i tâlibe def‘ ü i‘tâ olundu ki lede’l-istizhâr ızhâr eyleye.
Tahrîren fî-evâhiri şehri Şa‘bâni’l-mu‘azzam li-sene semân ve elf.
Şuhûdü’l-hâl: Mehmed b. Mustafa el-cündî ve Yakub b. Abdullah ve Ömer b. Abdullah ve Ömer b. Mustafa ve gayruhum mine’l-hâzırîn
|