|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 64 Hüküm no: 6 Orijinal metin no: [3-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Çelebi b. Muslu’nun tasarrufundaki vakıf odaları Mahmud Ağa b. Mirza’ya devrettiği
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin Ahmed Çelebi b. Muslu meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mahmud Ağa b. Mirza nâm cündî mahzarında bi’t-tav‘i’s-sâf ikrâr ve i‘tirâf edip karye-i mezkûre mahallâtından Pîrî Paşa iskelesinde vâki‘ bir tarafı lebideryâ ve bir tarafı debbağhâne ve iki tarafı tarîk-i âm ile mahdûd ve mümtâz olup merhûm ve mağfûrun-leh Pîrî Paşa evkāfından icâre-i mu‘accele ve müeccele ile mutasarrıf olduğum fevkānî ve tahtânî odaların hakk-ı tasarrufunu vakf-ı mersûmun mütevellîsi izniyle mesfûr Mahmud Ağa’ya tefvîz eyledim ol dahi vech-i mübeyyen üzre tefevvuz ve kabûl eyleyip mukābele-i tefvîzde mesfûr Mahmud Ağa yedin[den] fıddî râyic fi’l-vakt on bir bin akçe alıp kabz eyledim mâdem ki beher mâh zikr olunan odaların icâresin vakf-ı mezbûra edâ eyleye tasarrufuna bir ferd mâni‘ olmaya dedikde mukırr-ı merkūmun ikrâr-ı meşrûhunu el-mukarru lehü’l-mezbûr Mahmud Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî şehri Saferi’l-hayr li sene semânin ve selâsin ve elf.
Şuhûdü’l-hâl: Mehmed b. Mehmed er-Reis, Yusuf Bey b. Hüseyin es-Serrâc, Ahmed Bey b. Abdullah el-Cündî, Ömer Bey b. Mustafa serrâc, Ali b. Abdullah er-Râcil, Mehmed Beşe b. Hasan er-Râcil, Muslu b. Ahmed, Mahmud Çelebi b. Mustafa el-İmâm
|