.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 65
Hüküm no: 8
Orijinal metin no: [4-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Cihan Hâtun’un eviyle ilgili vakfiyesi

Elhamdü li veliyyihî ve’s-salâtü alâ Nebiyyihî ve âlihî ve ashâbihî ecma‘în ammâ ba‘d. Havâss-ı aliyye kazâsı muzâfâtından Hasköy mahallâtından Abdüsselam mahallesinde sâkine işbu hayrât-ı hasenâtın sâhibesi fahrü’l-muhadderât Cihan Hâtun bt. Abdullah meclis-i şerî‘a-yı garrâda vakf-ı âti’l-beyâna li ecli’t-tescîl mütevellî nasb eylediği Mustafa b. Abdullah mahzarında bi’t-tav‘i’s-sâf ikrâr ve i‘tirâf eyledi ki silk-i mülkümde muntazam olup mahalle-i mezbûre[de] vâki‘ bir tarafı Meryem Hâtun mülkü ve bir cânibi Muzaffer mülkü ve bir cânibi Kasabbaşı mülkü ve bir cânibi İmâm vakf[ı]? ile mahdûd ve mümtâz olup iki bâb tahtânî ve bir bi’r-i mâ’ı ve eşcâr-ı müsmire ve gayr-ı müsmireyi müştemil mülk menzilimi cemî‘ tevâbi‘i ve levâhıkı ile hasbeten lillâhi’l-aliyyi’l-azîm ve taleben li merdâti’r-Rabbi’r-rahîm vakf-ı sahîh-i şer‘î ve habs-i sarîh-i mer‘î kılıp şöyle şart eyledi ki hayâtda oldukça menzil-i mezkûrede ben sâkine ve mutasarrıfa olup vefâtımdan sonra câriyelerim Rukiye bt. Abdullah ve Kaya bt. Abdullah nâm câriye-i müdebberelerim sâkinler olup ba‘de vefâtihim mezbûrların evlâd ve evlâd u evlâdına batnen ba‘de batnin neslen ba‘de neslin sâkinler olup mezbûrların süknâya ihtiyâçları yok ise îcâr edip icâresin alalar. Ba‘de’l-inkırâz el-iyâzü billâhi min kahri’l-feyyâz menzil-i mezkûr ecr-i misli ile hâsıl olan icâresini mahalle-i mezkûrede her kim imâm olursa ona verilip ol dahi mukābelesinde her gün üç ihlâs-ı şerîf kırâ’at edip sevâbını rûhuma hibe eyleye deyû menzil-i mezkûru ba‘de’t-tahliyeti’ş-şer‘iyye mütevellî-i merkūma teslîm ol dahi tesellüm edip sâir evkāf mütevellîleri gibi tasarruf eyledi dedikde, vâkıfe-i mezbûre[yi] ikrâr-ı meşrûhasında mütevellî-i merkūm dahi vicâhen tasdîk ettikden sonra vâkıfe-i mezbûre zimâm-ı kelâmını makām-ı âharda atf edip vakf-ı akār muktedâ-yı e’imme-i kibâr olan İmâm-ı A‘zam ve hümâm-ı efham re’y-i şerîfleri üzre eğerçi müsellem ve makbûldür velâkin onun katında lüzûmu îcâb eylemez zamâne amâne? ihtiyâr ve feth-i es‘âba? iktidârından …? deyû vakfından rücû‘ ve mütevellîden istirdâda şürû‘ ettikde mütevellî-i mezbûr da cevâb verip eğerçi hâl bast olunan minvâl üzredir fe-ammâ imâmeyn-i hümâmeyn kavl-i şerîfleri üzre sıhhat-i lüzûmdan müfârekat etmeyi[p] vakıf sahîh olıcak buyurmuşlar deyû akār-ı mezkûru teslîmden [5] imtinâ‘ ve husûmet ve nizâ‘ edip vâkıfe-i mezbûre ile hâkim-i mâ hüve’l-ahkâma murâfa‘a olup hüküm taleb eylediklerinde hâkim-i müşârun-ileyh dahi cânib-i vakfı evlâ görüp ve imâmeyn-i hümâmeyn kavl-i şerîfleri üzre sıhhat-i vakfa ve sâniyen lüzûmuna hükmedip mahkûm olmağla min ba‘d naks [ve] nakzına mecâl muhâl ve tebdîl u tağyîr mümteni‘ü’l-ihtimâl olup “fe-men beddelehû ba‘de mâ semi‘ahû fe-innemâ ismuhû alellezîne tübeddilûnehû innallâhe semî‘un alîm” ve ecrü’l-vâkıfı ale’l-hayyi’l-cevâdi’l-kerîm. Cerâ zâlike ve hurrire fî evâhiri Rebî‘ilevvel sene semânin ve selâsin ve elf.


Şuhûdü’l-hâl: Muzaffer b. Abdullah, Hüseyin b. Abdullah, Ahmed Çelebi el-İmâm, el-Hâc Hasan b. Abdullah er-Râcil, Ali b. ( ) muhzır, Şaban b. Abdullah, Sinan Beşe b. Abdullah er-Râcil, Yusuf b. Abdullah, (…), Mustafa b. Mehmed, Ahmed Bey b. Mehmed