.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 66
Hüküm no: 9
Orijinal metin no: [5-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Murad v. Serkis’in Eğin’deki bağı ile evinin dörtte üç hissesini oğullarına sattığı

Vilâyet-i Anadolu’da Arapgir sancağına tâbi‘ Eğin nâm kasabada sâkin Murad v. Serkis nâm Ermeni meclis-i şer‘-i hatîr-i lâzımü’t-tevkīrde işbu râfi‘ü’l-kitâb sulbî oğulları Serkis ve Agop ve Kerenc nâm Ermeni mahzarlarında bi’t-tav‘i’s-sâf ikrâr ve i‘tirâf edip kasaba-i mezbûre kurbunda vâki‘ bir tarafı Ağanes Papas bağı ve bir tarafı Murad suyu ve bir tarafı Bâli v. Safer ve bir tarafı Süleyman b. Nasrullah bağı ile mahdûd olan bağımın ve yine kasaba-i mezbûrede vâki‘ bir tarafı Garabet v. Budak mülkü ve bir [tarafı] Marderos v. Keşiş mülkü ve bir tarafı Bahtek v. Yakob mülkü ve bir tarafı tarîk-i âm ile mahdûd olan bir bâb mülk menzilimin dört sehimden üç sehmini oğullarım mezbûrûna üç yüz kâmil riyâlî guruşa safka-i vâhide[de] bey‘-i bâtt-ı sahîh-i şer‘î ile bey‘ edip onlar dahi ale’l-iştirâki’s-seviy iştirâ edip kabz-ı semen-i ma‘dûd ve meblağ-ı mahdûd ve mebî‘-i mezkûru mahallinde kabza taslît eyledim dedikde mukırr-ı merkūmun ikrâr-ı meşrûhunu el-mukarru-[lehümü’l-]mezbûrûn bi’l-muvâcehe tasdîk ve bi’l-müşâfehe [tahkīk] edicek mâ hüve’l-vâki‘ bi’t-taleb ketb [olundu]. Tahrîren fî evâili Rebî‘ilâhir sene semânin ve selâsin ve elf.


Şuhûdü’l-hâl: Cuvan v. Makdi, Serkis v. Ağanos, Bâli mezkûr, Marderos Keşiş ve Avraham Keşiş, Manik [v.] Anberşah, Agop [v.] Murad, Örik v. Bayık, Asvader [v.] Ağanos, Serkis v. Bayık, ve gayruhüm