|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 67 Hüküm no: 11 Orijinal metin no: [6-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Aynî bt. Mahmud’un tasarrufundaki vakıf debbağhâne hissesini Mehmed b. Bilal’e devrettiği
Havâss-ı aliyye kazâsına tâbi‘ Hasköy mahallâtından Turşucu [mahallesinde] sâkine Aynî bt. Mahmud nâm hâtun meclis-i şer‘-i lâzımü’t-tevkīrde işbu râfi‘ü’l-kitâb Mehmed b. Bilal nâm kimesne mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Hüseyin Bey mülkü ve bir tarafı Muslu mülkü ve bir tarafı lebideryâ ve bir tarafı tarîk-i âm ile mahdûd olup mâh be mâh on altı buçuk akçe icâre-i müeccele ile Pîrî Paşa Vakfı’ndan olan nısf debbağhâneyi izn-i mütevellî ile mezbûr Mehmed’e nakd-i râyic fi’l-vakt dört bin akçeye tefvîz edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre tefevvuz ve kabûl eyleyip mâdem ki beher mâh zikr olunan nısf debbağhânenin on altı buçuk akçe icâresin vakf-ı mezbûra edâ eyleye tasarrufuna bir ferd mâni‘ olmaya dedikde mukırra-i merkūmenin ikrâr-ı meşrûhasını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Recebi’l-ferd li sene semânin ve selâsin ve elf.
Şuhûdü’l-hâl: Mahmud Çelebi el-İmâm, Mehmed Halîfe b. Haydar el-Müezzin, İbrahim Çelebi [b.] Hüsrev el-İmâm, İbrahim [b.] Mustafa, Mehmed [b.] Mehmed er-Reis, el-Hâc Ali [b.] Mustafa, Muslu [b.] Mehmed, el-Hâc Ramazan [b.] Mahmud, ve gayruhüm
|