|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 69 Hüküm no: 14 Orijinal metin no: [7-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Şemseddin’in ölen babasının Kemal v. İlya’da kalan alacak davasında sulh olduğu
Mahmiye-i Galata hârici Tophâne Defterdâr mahallesinde sâkin Mehmed b. Şemseddin nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Kemal v. İlya nâm Yahudi mahzarında tak[rîr-i kelâm ve ta‘bîr ani’l-merâm edip] [8] mezbûr Kemal’e babam merhûm karz-ı şer‘îden yetmiş sikke-i hasene altın verip mezbûrdan meblağ-ı mezbûru da‘vâ ve taleb eylediğimde meblağ-ı mezbûru baban merhûma edâ ve teslîm eyledim deyû beynimizde münâza‘ât-ı kesîre ve muhâsamât-ı şedîde vâkı‘a olmuşdu el-hâletü hâzihî beynimizde muslihûn tavassut edip beş yüz akçeye ıslâh eylediklerinde ben dahi sulh-ı mezbûru kabûl ve bedel-i sulh olan mârrü’z-zikr beş yüz akçeyi mezbûr Kemal yedinden ahz u kabz eyleyip husûs-ı mezbûra müte‘allik cemî‘ da‘vâ ve mutâlebâtdan zimmetini ibrâ-i âm ile ibrâ ve ıskāt-ı tâm [ile] ıskāt eyledim ba‘de’l-yevm husûs-ı mezbûra müte‘allik da‘vâ ve nizâ‘ım sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı merkūmun ikrâr-ı meşrûhu el-mukarru lehü’l-mezbûr Kemal vicâhen ve şifâhen tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Şa‘bâni’l-mu‘azzam li sene semânin ve selâsin ve elf.
Şuhûdü’l-hâl: Mustafa Efendi b. Davud, Mehmed Ağa el-Cündî, Mustafa Bey b. Mehmed serbölük, el-Hâc Hasan [b.] Abdullah Bey, Mustafa Çelebi b. Mehmed es-Serrâc, Ömer Bey b. Mehmed es-Serrâc, el-Hâc Ömer b. Abdullah, el-Hâc Hatîb b. Ömer, Ömer Beşe b. Abdullah ve gayruhüm
|