.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 69
Hüküm no: 15
Orijinal metin no: [8-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Âkile ve bâliğa olan Fâtıma bt. İbrahim’in vasîsinde bulunan mallarının kendisine teslim edildiği

Mahmiye-i İstanbul mahallâtından Gül Câmi‘i mahallesinde sâkine Fâtıma bt. İbrahim nâm hâtun meclis-i şer‘-i hatîr-i lâzımü’t-tevkīrde vasîsi fahrü’l-akrân Mustafa b. Ali mahzarında bi’t-tav‘i’s-sâf ikrâr ve i‘tirâf edip bundan akdem babam merhûm-ı mezbûr fevt oldukda ben sagīre olmağın merkūm Mustafa Ağa vasîm olup babam merhûmdan intikāl eden emvâlimi kabz ve zabt etmişdi hâlen ben âkile ve bâliğa olup emvâlimi bi-nefsihî hıfz ve sıyânete kemâl-i iktidârım olmağın vasîyy-i merkūmun makbûzu olan otuz bin râyic fi’l-vakt akçeyi vasîyy-i merkūmdan alıp kabz eyledim ba‘de’l-yevm babam merhûm-ı mezbûrdan intikāl eden mâlımdan vasîyy-i merkūm zimmetinde bir akçe ve bir habbe kalmayıp zimmetini husûs-ı mezbûra müte‘allik cemî‘ da‘vâ ve husûmâtdan zimmetini ibrâ eyledim dedikde merkūm Mustafa Ağa dahi bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fî evâhiri Şa‘bâni’l-mu‘azzam li sene semânin ve selâsin ve elf.


Şuhûdü’l-hâl: El-Hâc Ahmed b. Mehmed, Mehmed Halîfe b. el-Hâc Hasan el-Müezzin, Yusuf b. Mustafa, Ahmed b. Himmet, el-Hâc Mustafa b. el-Hâc Ali, Ali Beşe b. Abdullah er-Râcil, Kasım Beşe b. Mustafa, Yusuf b. Abdullah, Ali b. Abdullah ve gayruhüm