|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 70 Hüküm no: 16 Orijinal metin no: [9-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Bey b. Ebûbekir’in vefat eden Mehmed b. Abdullah’taki alacağını kızının vasîsinden talep ettiği, bir kısmını tahsil edip kalanından vazgeçtiği
Dergâh-ı âlî dâmet mahfûfen bi’l-me‘âlî sipâhilerinden Mehmed Bey b. Ebûbekir nâm cündî meclis-i şer‘-i hatîr-i lâzımü’t-tevkīrde yine karye-i mezkûre mahallâtından el-Hâc Şaban mahallesinde sâkin iken bundan akdem vefât eden Mehmed b. Abdullah[‘ın] sagīre kızı Ümmühânî nâm sagīrenin vasîyy-i şer‘îsi olan Derviş Murad b. Hızır nâm kimesne mahzarında ikrâr ve takrîr-i kelâm edip bundan akdem vefât eden merhûm Mehmed’de karz-ı şer‘îden on iki bin akçe hakkım olup meblağ-ı merkūmdan sekiz bin akçeyi isbât ettikden sonra vasîyy-i mezbûr yedinden merkūmü’l-mikdâr akçeyi alıp kabz eylediğimden sonra bâkī kalan dört bin akçeyi da‘vâ ve talebden vasîyy-i mezbûrun zimmetini ibrâ-i âm ile ibrâ ve ıskāt-ı tâm ile ıskāt eyledim ba‘de’l-yevm husûs-ı mezbûra müte‘allik da‘vâ ve nizâ‘dan benden veyâhud vekîlimden sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı merkūmun ikrâr-ı meşrûhunu el-muka[rru leh] vasîyy-i mezbûr dahi vicâhen tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Şevvâli’l-mükerrem sene 1038.
Şuhûdü’l-hâl: Ahmed Efendi [b.] Abdi el-İmâm, Ali Beşe [b.] İshak, Ali b. Hüseyin, el-Hâc Ali [b.] Kasım, el-Hâc Yahya b. Mustafa, Ebûbekir b. Ömer, Hasan b. Uğurlu, Ahmed [b.] İlyas, Mehmed b. Mustafa ve gayruhüm
|