.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 70
Hüküm no: 17
Orijinal metin no: [9-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed b. Munyar’ın evini Fâtıma bt. Ali’ye sattığı

Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin Ahmed b. Munyar nâm kimesne meclis-i şer‘-i hatîr-i lâzımü’t-tevkīrde işbu râfi‘atü’l-kitâb Fâtıma bt. Ali nâm hâtun mahzarında bi’t-tav‘i’s-sâf ikrâr ve takrîr-i kelâm edip mahalle-i mezbûrede vâki‘ bir tarafı Abdülkerim mülkü ve bir tarafı Mustafa b. ( ) serbölük mülkü ve bir tarafı Mehmed b. Ali mülkü ve bir tarafı tarîk-i âmma muttasıl olan menzili fevkānî ve tahtânî iki bâb odayı ve müşterek bi’r-i mâ’ı tûlen on bir zirâ‘ ve arzan elli [zirâ‘] kenîfe muttasıl eşcâr-ı müsmireye değin menzil-i mahdûdu mezbûre Fâtıma’ya altı bin akçeye bey‘-i bâtt-ı sahîh-i şer‘î ile bey‘ edip semen olan meblağ-ı mezbûru merkūme Fâtıma yedinden bi’t-tamâm ahz u kabz eyledim ba‘de’l-yevm menzil merkū[m] Fâtıma’nın mülk-i müşterâsıdır [keyfe]mâ teşâ ve tahtâr mutasarrıfa olsun dedikde mukırr-ı merkūmun ikrâr-ı meşrûhunu el-mukarru leha’l-mezbûre Fâtıma bi’l-muvâcehe [tasdîk ve bi’l-müşâfehe tahkīk] [10] edicek mâ hüve’l-vâki‘ bi’t-taleb ketb olundu. Tahrîren fî evâhiri Şevvâli’l-mükerrem sene semânin ve selâsin ve elf.


Şuhûdü’l-hâl: Mehmed Bey b. Mirza el-Cündî, Mehmed b. Mısr, Mustafa Halîfe [b.] Surûrî, Ömer Bey b. Mustafa saraç, Yakub [b.] Aydın es-Serrâc, Mehmed b. Mirza serbölük, Mehmed b. Ali, Bâli [b.] Ahmed, Ramazan [b.] Ahmed ve gayruhüm