.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 72
Hüküm no: 20
Orijinal metin no: [11-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Hacı Ali’nin borcu için arsasının müzâyede ile Mehmed Bey b. Mirza’ya satıldığı

Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin iken vefât [eden] el-Hâc Ali’nin Hüseyin ve Veli nâm sagīr oğullarının vasîyy-i şer‘îsi olan Mehmed b. Himmet mahfil-i şer‘de işbu râfi‘ü’l-kitâb Mehmed Bey b. Mirza nâm serbölük mahzarında ikrâr ve takrîr-i kelâm [edip] mahalle-i mezbûr[e]de vâki‘ bir tarafı Balat b. Ahmed mülküne ve bir tarafı Abdülganî mülküne ve bir tarafı Okmeydanı’na ve bir tarafı tarîk-i âm ile mahdûd ve mümtâz olan arz-ı hâliye müteveffâ-yı mezbûrun mülkü olup ba‘de vefâtihî oğulları sagīrân-ı mezbûrâna intikāl etmişdi, lâkin müteveffâ-yı mezbûrun karz-ı şer‘îden bin yedi yüz akçe deyni olup şuhûd-ı udûl ile benim muvâcehemde sâbit olup muhallefâtından hükm olunup lâkin müteveffâ-yı mezbûr[un] akār ve menkūl kısmından arz-ı hâliyeden gayrı terekesi olmamağla zarûret-i deyn-i merkūm için bey‘ olunmak [lâzım olmağın] sûk-ı sultânî’de kirâren nidâ olunup mersûm Mehmed Bey üzerinde bin üç yüz akçeye karâr edip bir akçe ziyâde ile âhar tâlibi olmamağın vesâyetim hasebiyle arz-ı hâliyeyi meblağ-ı merkūma mersûm Mehmed Bey’e bey‘ edip kabz-ı semen-i ma‘dûd ve teslîm-i mebî‘ eyledim dedikde vasîyy-i mezbûru kelimât-ı meşrûhasında müşterî-i mezkûr dahi bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fî evâili Zilka‘deti’ş-şerîfe sene 1038.


Şuhûdü’l-hâl: Mehmed Bey b. Mirza el-Cündî, Ömer Bey b. Mustafa serrâc, Mustafa Halîfe [b.] Server el-İmâm, Mehmed Bey [b.] Mustafa serbölük, Ramazan [b.] Mehmed, Mehmed Beşe [b.] Ali er-Râcil, Hüseyin Bey el-Cündî